کراچی ( پاک ترک نیوز) پاکستان پیپلز پارٹی کی مرکزی ترجمان شازیہ عطا مری نے کہا ہے کہ خیبرپختونخوا کے حالات سب کے سامنے ہیں، صوبے میں کسی کی جان محفوظ نہیں، حالات اس حد تک بگڑ چکے ہیں کہ پشاور شہر بھی محفوظ نہیں رہا۔پارلیمنٹ کے باہر پریس کانفرنس کرتے ہوئے شازیہ مری نے کہا کہ خیبرپختونخوا میں کئی خاندان تباہ ہو چکے ہیں اور اب دہشت گردی کی آگ شہروں تک پہنچ گئی ہے۔ دہشت گردی ایک حقیقت ہے، جسے نظر انداز نہیں کیا جا سکتا۔
یہ بھی پڑھیں: پاکستان کی کریڈٹ ریٹنگ بہتر بنانے کے لیے فچ سے مشاورت
شازیہ مری نے کہا کہ افسوس کے ساتھ کہنا پڑتا ہے کہ خیبرپختونخوا میں تیرہ سال سے ایسی حکومت رہی جو دہشت گردی میں کمی نہ لا سکی۔ میں سوال کرتی ہوں کہ تیرہ سال کے دوران تحریک انصاف کی حکومت نے کیا کیا؟پیپلز پارٹی کی ترجمان کا کہنا تھا کہ دہشت گردی کے خاتمے کے لیے آٹھ سو ارب روپے کی خصوصی مالی معاونت کوئی معمولی رقم نہیں تھی۔ یہ فنڈز دہشت گردی کے خاتمے کے لیے فراہم کیے گئے تھے، لیکن آج بھی صوبے میں امن و امان کی صورت حال پر سوالات اٹھ رہے ہیں۔
