تہران ( پاک ترک نیوز) ایران کے صدر مسعود پزشکیان کی امریکہ کے صدر ڈونلڈ ٹرمپ سے ملاقات متوقع ہے ۔ ایرانی صدرآج نیو یارک روانہ ہوں گے ۔
ایرانی صدارتی دفتر کے مطابق صدر مسعود پزشکیان بھی آج تہران سے نیویارک کے لیے روانہ ہوں گے۔ایرانی صدر مسعود پزشکیان کی امریکی صدر ڈونلڈ ٹرمپ سے ملاقات متوقع ہے، تاہم ملاقات کے حوالے سے حتمی تفصیلات سامنے نہیں آئی ہیں۔
ایرانی صدر کے دورۂ نیویارک کے دوران خطے کی صورتحال، ایران امریکا کشیدگی اور جاری تنازعات کے سفارتی حل سمیت اہم عالمی امور زیرِ بحث آنے کا امکان ہے۔
دوسری جانب ایرانی وزیر خارجہ عباس عراقچی اقوام متحدہ کی جنرل اسمبلی کے اجلاس میں شرکت کے لیے نیویارک پہنچ گئے۔ایرانی حکام کے مطابق عباس عراقچی جنرل اسمبلی کے اجلاس کے دوران مختلف عالمی رہنماؤں اور حکام سے ملاقاتیں کریں گے۔
یہ بھی پڑھیں: امریکی صدر کا ایران کو الٹی میٹم
دریں اثنا ایران کے جوہری عدم پھیلاؤ کے معاہدے سے دستبرداری کا بل ایرانی پارلیمنٹ میں پیش کردیا گیا۔بل میں مؤقف اختیار کیا گیا ہے کہ جوہری عدم پھیلاؤ کے معاہدے، یعنی این پی ٹی میں رہنے سے ایران کو کوئی فائدہ حاصل نہیں ہو رہا۔بل کے مطابق ایران پر مسلط جنگ اور بگڑتی ہوئی معاشی صورتحال کے باعث این پی ٹی میں رہنا ملک کے لیے نقصان دہ ہے۔
بل میں کہا گیا ہے کہ ایران کو اپنے امور کے بارے میں آزادانہ فیصلے کرنے کے لیے جوہری عدم پھیلاؤ کے معاہدے سے نکل جانا چاہیے۔
