اسلام آباد( پاک ترک نیوز) نائب وزیراعظم اور وزیر خارجہ اسحاق ڈار نے کہا ہے کہ غزہ میں جنگ بندی کی روزانہ خلاف ورزی کی جا رہی ہے، جبکہ مقبوضہ فلسطینی علاقوں، غزہ اور مغربی کنارے کی صورتحال فوری توجہ کی متقاضی ہے۔نیویارک میں اسلامی تعاون تنظیم کی کمیٹی برائے فلسطین سے خطاب کرتے ہوئے اسحاق ڈار نے کہا کہ فلسطین کا مسئلہ اسلامی تعاون تنظیم اور مسلم امہ کے اجتماعی شعور میں مرکزی حیثیت رکھتا ہے۔انہوں نے کہا کہ چھ رکنی کمیٹی پر فلسطینی عوام کے لیے سیاسی اور سفارتی حمایت متحرک کرنے کی اہم ذمہ داری عائد ہوتی ہے۔
یہ بھی پڑھیں: ایرانی صدر کی ٹرمپ سے ملاقات متوقع
نائب وزیراعظم نے غزہ میں تنازع کے خاتمے کے لیے امریکا، مصر، قطر اور ترکیہ کی کوششوں کو سراہتے ہوئے کہا کہ پاکستان فلسطینی عوام کی حمایت جاری رکھے گا۔اسحاق ڈار نے کہا کہ غزہ کی تعمیر نو اور طرز حکمرانی سے متعلق تمام انتظامات فلسطینی قیادت کی سربراہی میں ہونے چاہییں۔ پاکستان غزہ امن منصوبے اور سلامتی کونسل کی متعلقہ قراردادوں پر مکمل عمل درآمد کی حمایت کرتا ہے۔انہوں نے کہا کہ مسجد اقصیٰ میں انتہا پسند اسرائیلی آباد کاروں کی دراندازیاں عالمی قوانین کی خلاف ورزی ہیں۔ پاکستان مقبوضہ فلسطینی علاقوں میں اسرائیل کی غیر قانونی آباد کاری، الحاق اور جبری بے دخلی کو مسترد کرتا ہے۔
اسحاق ڈار نے اس عزم کا اعادہ کیا کہ پاکستان فلسطینی عوام کے جائز حقوق کے حصول اور ان کی سیاسی و سفارتی حمایت کے لیے اپنا کردار جاری رکھے گا۔
