بیجنگ ( پاک ترک نیوز) وزیراعلیٰ پنجاب مریم نواز شریف نے سنکیانگ میں چین کی معروف ٹائرن وزڈم ڈیری کمپنی کے ہیڈ کوارٹر کا دورہ کیا، جہاں کمپنی حکام نے وزیراعلیٰ اور ان کے وفد کا پرتپاک استقبال کیا۔مریم نواز شریف نے ٹائرن وزڈم ڈیری ورکس کے مختلف شعبوں کا دورہ کیا، جہاں حکام نے انہیں جدید ڈیری فارمنگ اور ملک پروسیسنگ کے حوالے سے تفصیلی بریفنگ دی۔
وزیراعلیٰ پنجاب نے ملک پروسیسنگ کے مراحل کا ڈیجیٹل معائنہ کیا، جبکہ ماہرین نے دودھ، دہی اور دیگر ڈیری مصنوعات کی تیاری کے مختلف مراحل سے آگاہ کیا۔بریفنگ میں بتایا گیا کہ ٹائرن وزڈم ڈیری ورکس چین کے مختلف علاقوں میں جدید ترین ڈیری فارمنگ کے حوالے سے معروف ہے، جبکہ فارمز پر مویشیوں کی حفظانِ صحت کے اصولوں کے مطابق پرورش کی جاتی ہے۔
مریم نواز شریف نے کہا کہ پنجاب میں لائیو اسٹاک کی بہتری اور فروغ کے منصوبے نتیجہ خیز ثابت ہو رہے ہیں۔ دیہی خواتین کی مالی خودمختاری اور مویشیوں کی افزائشِ نسل کے خصوصی منصوبے بھی کامیابی سے جاری ہیں۔وزیراعلیٰ پنجاب نے بتایا کہ مویشیوں کو فربہ کرکے میٹ پروڈکشن کے لیے تیار کیا جا رہا ہے۔
یہ بھی پڑھیں: چینی کمپنی نے کیٹی بندر پورٹ کا ماسٹر پلان پیش کردیا، ابتدائی لاگت 52 کروڑ ڈالر سے زائد
مریم نواز شریف نے کہا کہ چین کے اشتراک سے پنجاب میں ملک اور ڈیری پروسیسنگ پراجیکٹ قائم کرنا چاہتے ہیں، جس سے صوبے میں لائیو اسٹاک اور ڈیری کے شعبے کو مزید فروغ ملے گا۔
