واشنگٹن ( پاک ترک نیوز) امریکی صدر ڈونلڈ ٹرمپ نے ایران کے خلاف امریکی فوجی کارروائی کو درست فیصلہ قرار دے دیا۔ایک انٹرویو میں ٹرمپ کا کہنا تھا کہ امریکا نے ایران کو جوہری ہتھیار حاصل کرنے سے روکنے کے لیے کارروائی کی، اگر امریکا حملہ نہ کرتا تو ایران جوہری ہتھیار حاصل کر لیتا۔ٹرمپ نے دعویٰ کیا کہ امریکی حملوں نے ایران کی فوجی اور جوہری صلاحیتوں کو شدید نقصان پہنچایا ہے۔امریکی صدر کے مطابق ایران کی بحریہ اور فضائیہ کو شکست دی جا چکی ہے، ایرانی قیادت کا بڑا حصہ ختم ہو چکا ہے جبکہ ملک میں تقریباً سب کچھ تباہ ہو چکا ہے۔
یہ بھی پڑھیں: تیل و گیس کے شعبے سے اچھی خبر، بوبی آئل فیلڈ میں تیل دریافت
ٹرمپ نے دعویٰ کیا کہ امریکی فورسز نے ایران کے نئے نصب کیے گئے ریڈار کو بھی نشانہ بنایا۔امریکی صدر نے مزید کہا کہ آبنائے ہرمز پر امریکا کا مکمل کنٹرول ہے اور امریکی کارروائیوں کے باعث اس اہم بحری گزرگاہ میں جہازوں کی آمدورفت جاری ہے۔ٹرمپ کے مطابق امریکا ایران پر اقتصادی دباؤ بھی بڑھا رہا ہے، جس کے نتیجے میں ایرانی معیشت شدید بحران کا شکار ہے۔
