کراچی ( پاک ترک نیوز) نوجوان تاجر میر رضا کے قتل کیس کی تحقیقات جاری ہیں، تفتیشی ذرائع کے مطابق قبر کشائی کے دوران حاصل کیے گئے نمونوں کی کیمیکل ایگزامین رپورٹس آج متوقع ہیں۔
تفتیشی ذرائع کا کہنا ہے کہ کیمیکل ایگزامین لیبارٹری سے 9 رپورٹس کا نتیجہ آج موصول ہونے کا امکان ہے، جس سے تحقیقات میں مزید پیش رفت متوقع ہے۔
ذرائع کے مطابق میر رضا کی اسمارٹ واچ اور موبائل فون بھی آج پنجاب فارنزک لیبارٹری لاہور بھیجے جانے کا امکان ہے۔ میر رضا کے والدین نے اسمارٹ واچ اور موبائل فون پنجاب فارنزک لیبارٹری بھجوانے کی خواہش کا اظہار کیا تھا۔
تفتیشی ٹیم میں شامل ارکان نے گزشتہ روز میر رضا کے والدین سے بھی ملاقات کی اور کیس سے متعلق مختلف امور پر معلومات حاصل کیں۔
ذرائع کے مطابق تحقیقاتی ٹیم میں شامل نئے افسران نے حفاظتی ضمانت لینے والے بزنس پارٹنر احمد سمیت دیگر افراد کے بیانات بھی دوبارہ قلمبند کیے ہیں۔
تحقیقاتی ٹیم نے مختلف مقامات کی سی سی ٹی وی فوٹیج کا ایک ایک کرکے دوبارہ بغور جائزہ بھی لیا ہے، جبکہ کیس سے متعلق دستیاب دیگر شواہد کا بھی تجزیہ کیا جارہا ہے۔
تفتیشی ذرائع کا کہنا ہے کہ تاحال تحقیقات میں ایسے شواہد سامنے نہیں آئے جن کی بنیاد پر کسی شخص پر شک ظاہر کیا جاسکے۔
یہ بھی پڑھیں: میر رضا قتل کیس، عدالت کا تفتیش میں سست روی پر اظہار تشویش
ذرائع کے مطابق تحقیقاتی ٹیم میں شامل تھانیدار غلام نبی آفریدی اور ڈی ایس پی حنیف کو کیس کے حوالے سے دو مختلف نوعیت کے ٹاسک سونپے گئے ہیں۔
تفتیشی ٹیم کی جانب سے مختلف پہلوؤں سے تحقیقات جاری ہیں اور فارنزک رپورٹس سامنے آنے کے بعد کیس کی سمت مزید واضح ہونے کی توقع ہے۔
