ریاض: (پاک ترک نیوز)سعودی عرب نے حج 2026 ءکی تیاریوں کا باضابطہ آغاز کرتے ہوئے ابتدائی حج پیکج کے ترجیحی مرحلے کا اعلان کر دیا ہے، جبکہ عمرہ ویزوں کی آخری تاریخ بھی مقرر کر دی گئی ہے۔
حکام کے مطابق عمرہ ویزے 19 مارچ کو بند کر دیے جائیں گے، عمرہ زائرین کی سعودی عرب آمد کی حتمی تاریخ 2 اپریل جبکہ واپسی کی آخری تاریخ 18 اپریل مقرر کی گئی ہے۔
سعودی وزارتِ حج و عمرہ کی جانب سے سرکاری “نسک حج” پلیٹ فارم پر ابتدائی حج پیکجز کے ترجیحی مرحلے کا آغاز کیا گیا ہے۔
یہ مرحلہ خاص طور پر ان افراد کے لیے متعارف کرایا گیا ہے جو سرکاری بکنگ کھلنے سے پہلے اپنی خدمات کو شارٹ لسٹ اور ترجیحی بنیادوں پر منتخب کرنا چاہتے ہیں۔نسک حج پلیٹ فارم عازمینِ حج کو مختلف سہولیات فراہم کرتا ہے، جن میں رہائش، ٹرانسپورٹ، کیٹرنگ اور دیگر ضروری خدمات کی پیشگی معلومات اور انتخاب شامل ہے۔
یہ نظام خاص طور پر بزرگ مسافروں اور خصوصی ضروریات رکھنے والے افراد کے لیے معاون ثابت ہو رہا ہے تاکہ وہ بروقت اور آسانی سے اپنی حج تیاری مکمل کر سکیں۔حکام کا کہنا ہے کہ عمرہ سیزن کے اختتام کے بعد مکمل توجہ حج انتظامات پر مرکوز کر دی جائے گی تاکہ 2026 ء کے حج کو مزید منظم اور سہل بنایا جا سکے۔
وزارت نے زائرین کو ہدایت کی ہے کہ وہ مقررہ تاریخوں کی سختی سے پابندی کریں اور اپنی سفری منصوبہ بندی بروقت مکمل کریں۔سعودی عرب کی جانب سے جدید ڈیجیٹل نظام کے ذریعے حج و عمرہ کے انتظامات کو بہتر بنانے کی کوششیں جاری ہیں، جس کا مقصد دنیا بھر سے آنے والے لاکھوں عازمین کو محفوظ، منظم اور آرام دہ سفری تجربہ فراہم کرنا ہے۔
