پیرس (پاک ترک نیوز )فرانس نے اپنی جدید ترین ایم 51.3 بیلسٹک میزائل کا آبدوز سے پہلا تجربہ کیا ہے۔ میزائل ایٹمی وار ہیڈ کے بغیر فائر کیا گیا اور تجربے کے دوران شمالی بحر اوقیانوس کی جانب سفر کیا۔
فرانسیسی حکام کے مطابق میزائل تجربہ ملک کے مغربی ساحل کے قریب کیا گیا، جس کا مقصد جدید میزائل اور اسے لے جانے والی ایٹمی آبدوز کے مشترکہ نظام کی کارکردگی جانچنا تھا۔
میزائل کو فرانسیسی جوہری آبدوز لی ویجی لان سے زیرِ آب فائر کیا گیا۔ آبدوز پر بڑے پیمانے پر مرمت اور تکنیکی کام مکمل ہونے کے بعد یہ آزمائشی فائر کیا گیا، جس کے ذریعے یہ دیکھا گیا کہ آبدوز اور جدید میزائل ایک مربوط نظام کے طور پر کس طرح کام کرتے ہیں
یہ بھی پڑھیں:مکہ مشترکہ دفاعی معاہدے کو ترکیہ کی پارلیمنٹ میں پیش کرنے کی تیاری
ایم 51.3 میزائل کو زیرِ آب آبدوز سے گیس کے دباؤ کے ذریعے باہر نکالا جاتا ہے، جس کے بعد اس کے ٹھوس ایندھن والے راکٹ انجن میزائل کو فضا میں انتہائی تیزی سے آگے بڑھاتے ہیں۔
رپورٹس کے مطابق میزائل کی پرواز کے دوران انتہائی بلند رفتار اور طویل فاصلے کی صلاحیتوں کو بھی جانچا گیا۔ تجربے کے دوران میزائل نے فرانس سے سیکڑوں میل دور مقررہ علاقے کو ہدف بنایا۔
فرانسیسی صدر ایمانوئل میکرون کے مطابق یہ تجربہ فرانس کی دفاعی اور تزویراتی صلاحیت کے اعتبار سے اہم پیش رفت ہے۔
فرانس اپنی جوہری دفاعی حکمت عملی میں آبدوز سے داغے جانے والے بیلسٹک میزائلوں کو مرکزی حیثیت دیتا ہے، جبکہ ایم 51.3 کو اس نظام کی جدید ترین شکل قرار دیا جا رہا ہے۔
حکام کے مطابق تجربے میں کسی قسم کا جوہری وار ہیڈ استعمال نہیں کیا گیا
