بیجنگ ( پاک ترک نیوز) چین اور مصر کی مشترکہ فضائی مشقوں کے دوران ایک غیر معمولی منظر سامنے آیا ہے، جہاں چینی فضائیہ کے YU-20 ایئر ٹینکر نے مصری رافیل جنگی طیارے کو دورانِ پرواز ایندھن فراہم کیا۔مصری مسلح افواج کے ترجمان کی جانب سے سوشل میڈیا پر جاری کی گئی تصاویر میں چینی YU-20 کو مصری رافیل کے ساتھ فضائی ری فیولنگ کرتے دیکھا جاسکتا ہے۔
ماہرین کے مطابق کسی چینی ٹینکر کا غیر ملکی رافیل طیارے کو دورانِ پرواز ایندھن فراہم کرنا ایک نایاب منظر ہے اور یہ چین اور مصر کی فضائی افواج کے درمیان بڑھتی ہوئی عملی ہم آہنگی کو ظاہر کرتا ہے۔بیجنگ میں قائم ایرو اسپیس نالج میگزین کے چیف ایڈیٹر وانگ یانان کے مطابق YU-20 اور رافیل دونوں پروب اینڈ ڈروگ ری فیولنگ سسٹم استعمال کرتے ہیں، اس لیے دونوں طیاروں کے درمیان فضائی ایندھن کی منتقلی تکنیکی طور پر نسبتاً مطابقت رکھتی ہے۔ماہر کے مطابق اصل چیلنج ٹیکنالوجی سے زیادہ آپریشنل طریقہ کار ہوتا ہے، کیونکہ مختلف جنگی طیاروں کے ٹینکر کے قریب آنے کی رفتار، بلندی، فاصلہ اور ڈروگ سے جڑنے کے طریقے مختلف ہوتے ہیں۔
یہ بھی پڑھیں: فرانس کا بھارت کو رافیل کے حساس سورس کوڈز کی فراہمی سےپھر انکار
مشترکہ مشق سے قبل دونوں ممالک کی فضائی افواج کو ممکنہ طور پر رفتار، بلندی، رابطے کے طریقہ کار اور ری فیولنگ کے زاویوں سمیت مختلف تفصیلات پر مکمل ہم آہنگی پیدا کرنا پڑی ہوگی۔چین اور مصر کی جاری مشقوں میں فضائی ری فیولنگ کے علاوہ J-16 اور رافیل جنگی طیاروں کے درمیان فضائی جنگی مشقیں بھی شامل ہیں۔چینی J-16 طیاروں نے مصری MiG-29 اور رافیل طیاروں کے خلاف فضائی جنگی مشقوں میں حصہ لیا۔ ماہرین کے مطابق یہ پہلی مرتبہ ہے کہ کسی مشترکہ مشق میں چینی J-16 اور مصری رافیل طیاروں نے ایک ساتھ تربیتی سرگرمی انجام دی ہے۔
اس سے قبل چین نے ایسی مشقوں میں J-16 طیارے تعینات نہیں کیے تھے جبکہ مصر کے رافیل طیارے بھی پہلی بار اس نوعیت کی چینی مشترکہ مشق کا حصہ بنے ہیں۔YU-20 دراصل چین کے Y-20 ٹرانسپورٹ طیارے پر مبنی فضائی ٹینکر ہے، جسے چینی فضائیہ کے جنگی طیاروں کو دورانِ پرواز ایندھن فراہم کرنے کے لیے تیار کیا گیا ہے۔چین کی جانب سے جاری کردہ ایک پروموشنل ویڈیو میں YU-20 کو J-35، J-20، J-16 اور J-15 جیسے مختلف جنگی طیاروں کے ساتھ فضائی ری فیولنگ کرتے دکھایا گیا تھا۔
