بیجنگ (پاک ترک نیوز)چین کے علاقے تبت میں 7.1 شدت کے شدید زلزلے نے تباہی مچا دی، کم از کم 16 افراد ہلاک اور 65 زخمی ہو گئے جبکہ سینکڑوں مکانات زمین بوس ہو گئے۔ دوسری جانب پاکستان نے چین کو ہر ممکن امداد کی پیشکش کر دی ہے۔
امریکی جیولوجیکل سروے کے مطابق زلزلے کا مرکز تبت کے شمالی شہر ناگچو سے 191 کلومیٹر شمال مشرق میں 18 کلومیٹر گہرائی میں تھا، جس کے بعد 4.3 اور 5.2 شدت کے 7 آفٹر شاکس بھی محسوس کیے گئے۔
زلزلے کی وجہ سے ناگچو میں 339 سے زائد مکانات منہدم ہوئے، لینڈ سلائیڈنگ سے نیشنل ہائی وے 317 کا ایک حصہ بلاک ہو گیا جبکہ مواصلاتی نظام متاثر ہونے اور احتیاطی تدابیر کے تحت ریلوے ٹریفک بھی روک دی گئی ہے۔
یہ بھی پڑھیں: بیگم نصرت بھٹو بہادر،ہمدرد سیاسی رہنما ،آمریت کے خلاف مزاحمت کی علامت تھیں،صدر زرداری
چینی صدر شی جن پنگ نے فوری ریسکیو آپریشن اور طبی امداد کی ہدایت جاری کر دی ہیں، جہاں 1,600 سے زائد امدادی اہلکار، ہزاروں خیمے، راشن اور گرم کپڑے متاثرہ علاقوں میں بھجوا دیے گئے ہیں۔ حکام نے خدشہ ظاہر کیا ہے کہ ملبے تلے دبے افراد کی وجہ سے ہلاکتوں میں مزید اضافہ ہو سکتا ہے۔
وزیراعظم پاکستان شہباز شریف نے زلزلے سے ہونے والے جانی و مالی نقصان پر گہرے دُکھ کا اظہار کرتے ہوئے سوشل میڈیا پلیٹ فارم ‘ایکس’ پر اپنے پیغام میں کہا کہ پاکستان اس مشکل گھڑی میں چینی عوام اور صدر شی جن پنگ کے ساتھ شانہ بشانہ کھڑا ہے اور اپنے چینی بھائیوں کو ہر قسم کی امداد فراہم کرنے کے لیے مکمل طور پر تیار ہے۔
