ریاض ( پاک ترک نیوز) سعودی عرب نےعالمی ادارۂ صحت (ڈبلیو ایچ او) کے ڈائریکٹر جنرل کے عہدے کی 2027 سے 2032 تک آئندہ پانچ سالہ مدت کے لیے ڈاکٹر حنان حسن بلخی کو نامزد کر دیاہے۔
سعودی سرکاری میڈیاکے مطابق یہ نامزدگی عالمی ادارۂ صحت میں سعودی عرب کے اہم کردار کی عکاسی کرتی ہے جس کے تحت گلوبل ہیلتھ سکیورٹی کو مضبوط کرنے اور دیگر ممالک کو موثر، پائیدار اور مستحکم ہیلتھ سسٹم بنانے میں مدد فراہم کرنا ہے جو حالیہ اور مستقبل کے صحت کے مسائل حل کر سکے۔ڈاکٹر بلخی عمومی صحت، متعدی بیماریاں، انفیکشن سے بچاؤ اور کنٹرول، ہیلتھ سکیورٹی، ہیلتھ سسٹمز اور بین الاقوامی صحت کے شعبوں میں وسیع سائنسی اور لیڈرشپ کا تجربہ رکھتی ہیں۔ان کے پاس عالمی ادارۂ صحت کے تینوں لیولز ملکی، علاقائی اور عالمی سطح پر قیادت کا بڑا تجربہ موجود ہے۔ان کا سب سے اہم کردار عالمی ادارہ صحت کے مشرقی بحیرۂ روم کے لیے بطور ریجنل ڈائریکٹر منتخب ہونا ہے جبکہ وہ اینٹی مائیکروبیل مزاحمت کے لیے پہلی اسسٹنٹ ڈائریکٹر جنرل بھی رہ چکی ہیں۔
یہ بھی پڑھیں: ڈاکٹر حنان حسن بلخی عالمی ادارۂ صحت کی ڈائریکٹر جنرل کے عہدے کے لیے نامزد
اپنے کیریئر کے دوران انہوں نے معاشرے کے تحفظ اور صحتی نظام کی صلاحیتوں کو بڑھانے کے مقصد سے تیار کیے گئے متعدد اقدامات اور پالیسیوں کی تشکیل اور ان پر عمل درآمد میں اہم کردار ادا کیا ہے۔سعودی عرب کی جانب سے ڈاکٹر بلخی کی نامزدگی اس امر کی عکاسی کرتی ہے کہ سعودی عرب عالمی ادارۂ صحت کی مسلسل ترقی میں اپنا کردار ادا کرنے، رکن ممالک کی ضروریات کے مطابق ادارے کی مؤثر انداز میں ردِعمل دینے کی صلاحیت کو مضبوط بنانے، مساوات، شفافیت اور کارکردگ کے اصولوں کو برقرار رکھنے، اور ایسی مؤثر بین الاقوامی شراکت داریوں کے فروغ کا خواہاں ہے جو دنیا بھر میں صحت اور فلاح و بہبود کو آگے بڑھانے میں معاون ثابت ہوں۔
