اسلام آباد: (پاک ترک نیوز) پریس کانفرنس کے دوران وفاقی وزیر اور مسلم لیگ (ن) کے سینئر رہنما امیر مقام نے کہا کہ خیبر پختونخوا میں پی ٹی آئی کو تقریباً 13 برس سے اقتدار حاصل ہے، لیکن طویل عرصے سے حکومت میں رہنے کے باوجود صوبائی قیادت اور وزیراعلیٰ کی جانب سے مسائل کے حل پر مطلوبہ توجہ نظر نہیں آتی۔
انہوں نے خیبر پختونخوا میں امن و امان کی موجودہ صورتحال پر تشویش کا اظہار کیا۔ کہا کہ صوبے میں آئے روز دہشت گردی سمیت مختلف ناخوشگوار واقعات رونما ہو رہے ہیں، جس سے عام شہریوں کو مشکلات اور عدم تحفظ کا سامنا ہے۔
وفاقی وزیر نے کہا کہ پی ٹی آئی نے حکومت میں آنے سے پہلے عوام سے متعدد وعدے کیے تھے، تاہم موجودہ صورتحال میں اس کی حکومتی کارکردگی پر سوالات اٹھ رہے ہیں۔ سوال کیا کہ پی ٹی آئی کے طویل دورِ حکومت میں صوبے کے عوام کو عملی طور پر کیا ریلیف فراہم کیا گیا۔
یہ بھی پڑھیں :بشریٰ بی بی کی سزا معطلی کی درخواست جلد سماعت کے لیے مقرر کرنے کی کوششیں
انہوں نے کہا کہ صوبائی قیادت عوامی مسائل کے حل کے بجائے سیاسی نعرے بازی اور سوشل میڈیا ویڈیوز تک محدود ہو کر رہ گئی ہے، جبکہ خیبر پختونخوا کے عوام کو درپیش مسائل کے حل، امن و امان کی بہتری اور مؤثر حکمرانی کے لیے عملی اقدامات کی ضرورت ہے۔
