اسلام آباد: (پاک ترک نیوز)وفاقی حکومت نے ملک میں پیٹرولیم مصنوعات کی قیمتیں برقرار رکھنے کا فیصلہ کر لیا ہے، جس کا باقاعدہ اعلامیہ پیٹرولیم ڈویژن کی جانب سے جاری کر دیا گیا ہے۔
اعلامیے کے مطابق پیٹرول اور ہائی اسپیڈ ڈیزل کی قیمتوں میں آئندہ پندرہ دنوں کے دوران کسی قسم کی کمی یا اضافہ نہیں ہوگا۔ قیمتوں میں یہ استحکام 16 جنوری سے نافذ العمل ہوگا اور اگلے 15 روز تک برقرار رہے گا۔
نوٹیفکیشن میں بتایا گیا ہے کہ پیٹرول کی فی لیٹر قیمت 253 روپے 17 پیسے جبکہ ہائی اسپیڈ ڈیزل کی قیمت 257 روپے 08 پیسے فی لیٹر ہی رہے گی۔
حکام کا کہنا ہے کہ یہ فیصلہ عالمی منڈی میں خام تیل کی صورتحال اور ملکی معاشی حالات کا تفصیلی جائزہ لینے کے بعد کیا گیا ہے۔ پیٹرولیم ڈویژن کے مطابق قیمتیں برقرار رکھنے کا مقصد عوام کو ممکنہ ریلیف دینا اور مہنگائی کے اثرات کو مزید بڑھنے سے روکنا ہے۔
واضح رہے کہ اس سے قبل مختلف ذرائع کی جانب سے یہ امکان ظاہر کیا جا رہا تھا کہ عالمی مارکیٹ میں تیل کی قیمتوں میں کمی کے باعث پاکستان میں بھی پیٹرولیم مصنوعات سستی ہو سکتی ہیں، تاہم حکومت نے فی الحال قیمتیں منجمد رکھنے کا فیصلہ کیا ہے۔
یاد رہے کہ رواں ماہ کے آغاز پر حکومت نے پیٹرول اور ڈیزل کی قیمتوں میں نمایاں کمی کا اعلان کیا تھا، جس کے بعد پیٹرول کی نئی قیمت 253 روپے 17 پیسے اور ڈیزل کی قیمت 257 روپے 08 پیسے فی لیٹر مقرر کی گئی تھی، جو اب بدستور برقرار رہے گی۔
