بیجنگ : (پاک ترک نیوز)بیجنگ میں قائم توانائی کمپنی نےہوا سے بجلی پیدا کرنے کے میدان میں ایک بڑی پیش رفت حاصل کر لی ہے۔ کمپنی نے دنیا کے پہلے میگاواٹ سطح کے فضائی ونڈ پاور سسٹم کی کامیاب آزمائشی پرواز اور بجلی کی قومی گرڈ کو فراہمی کا تجربہ مکمل کر لیا ہے۔
یہ تجربہ چین کے جنوب مغربی صوبے سیچوان کے شہر یی بین (Yibin) میں کیا گیا، جہاں یہ تیرتا ہوا ونڈ پاور پلیٹ فارم تقریباً 6,560 فٹ (2,000 میٹر) کی بلندی تک پہنچا اور کامیابی سے بجلی پیدا کر کے مقامی گرڈ میں شامل کر دی۔
آزمائش کے دوران سسٹم بتدریج بلند ہوا اور مقررہ بلندی پر مستحکم حالت میں معلق رہا، جس کے بعد اس نے 385 کلو واٹ آور بجلی پیدا کی۔ یہ S2000 فلوٹنگ ایئر بورن ونڈ انرجی سسٹم کی پہلی عملی اور حقیقی بجلی پیدا کرنے والی آزمائش تھی، جسے SAWES بھی کہا جاتا ہے۔
اس منصوبے کو تیار کرنے والی کمپنی بیجنگ لِنیی یونچوان انرجی ٹیکنالوجی کے مطابق S2000 دنیا کا پہلا ایسا میگاواٹ درجے کا فضائی ونڈ پاور نظام ہے جسے شہری علاقوں کے قریب استعمال کیلئے ڈیزائن کیا گیا ہے۔
ساخت کے لحاظ سے یہ نظام کسی سائنسی فکشن فلم کے فضائی جہاز جیسا دکھائی دیتا ہے، جس میں ایک بڑا تیرتا ہوا غلاف اور بجلی پیدا کرنے والا مربوط ڈھانچہ شامل ہے۔
اس کی لمبائی تقریباً 197 فٹ، چوڑائی 131 فٹ اور اونچائی بھی 131 فٹ ہے۔
رپورٹس کے مطابق یی بین میں ہونے والی آزمائش کے دوران اس نظام کو اپنی مطلوبہ بلندی تک پہنچنے میں تقریباً 30 منٹ لگے۔
اس کے بعد یہ مستحکم انداز میں فضا میں معلق رہا اور بجلی پیدا کرنے کا عمل جاری رکھا، جو مستقبل میں کمرشل استعمال کیلئے ایک اہم سنگِ میل سمجھا جا رہا ہے۔
یہ نظام ہیلیم سے بھرے ایک ایرو اسٹیٹ کی مدد سے ہلکے وزن کے ونڈ پاور یونٹ کو فضا کی بالائی تہوں تک لے جاتا ہے، جہاں ہوائیں زمین کے مقابلے میں زیادہ تیز اور مستقل ہوتی ہیں۔
فضا میں پہنچنے کے بعد یہ نظام ہوا کی توانائی کو بجلی میں تبدیل کرتا ہے اور ایک مضبوط کیبل کے ذریعے بجلی زمین تک منتقل کرتا ہے۔ یہی کیبل اس پلیٹ فارم کی سمت اور استحکام کو کنٹرول کرنے میں بھی مدد دیتی ہے، جس سے روایتی ونڈ ٹربائنز سے ہٹ کر نئے ہوا کے وسائل تک رسائی ممکن ہو جاتی ہے۔
ماہرین کا کہنا ہے اس نظام کے دو بنیادی استعمالات ہیں۔ ایک یہ کہ سرحدی چوکیوں یا دور دراز علاقوں جیسے آف گرڈ مقامات پر اسے مستحکم توانائی کے ذریعے کے طور پر استعمال کیا جا سکتا ہے۔ دوسرا یہ کہ یہ زمین پر نصب ونڈ پاور سسٹمز کے ساتھ مل کر ایک تھری ڈائمینشنل توانائی نظام تشکیل دے سکتا ہے۔
تحقیقی رپورٹس کے مطابق ہوا سے پیدا ہونے والی توانائی کا انحصار ہوا کی رفتار کے مکعب پر ہوتا ہے، یعنی بلندی پر ہوا کی رفتار میں معمولی اضافہ بھی کئی گنا زیادہ بجلی پیدا کر سکتا ہے، وہ بھی ماحول دوست اور کم کاربن طریقے سے۔
اسی فائدے کو بڑھانے کیلئے S2000 میں ایک خاص ڈکٹڈ ڈیزائن استعمال کیا گیا ہے، جو ہوا کو ہر سمت سے سمیٹ کر ٹربائنز تک پہنچاتا ہے۔
اس ڈکٹ میں 12 ونڈ ٹربائنز نصب کی گئی ہیں، جس سے توانائی کے حصول میں نمایاں اضافہ ہوتا ہے۔کمپنی کے مطابق تقریباً 20 ہزار مکعب میٹر حجم اور جدید ایروڈائنامک ڈیزائن کی بدولت اس نظام کی زیادہ سے زیادہ پیداواری صلاحیت 3 میگاواٹ تک ہے۔
چین کا انوکھا کارنامہ، ہوا میں معلق ونڈ پاور شپ سے بجلی پیدا
