بیجنگ ( پاک ترک نیوز) وزیراعلیٰ پنجاب مریم نواز شریف کی چین کے شین جیانگ وایغور خودمختار علاقے کی پارٹی سیکریٹری اور پروڈکشن اینڈ کنسٹرکشن کورپس کے پولیٹیکل کمشنر ہی ژونگ یو سے ملاقات ہوئی۔مریم نواز شریف نے پرتپاک خیرمقدم پر ہی ژونگ یو کا شکریہ ادا کیا اور ان کی دوراندیش قیادت کو سراہا۔وزیراعلیٰ پنجاب نے کمیونسٹ پارٹی آف چائنا کی 150ویں سالگرہ اور پاکستان چین تعلقات کے 75 سال مکمل ہونے پر بھی مبارکباد پیش کی۔ملاقات میں پنجاب اور شین جیانگ کے درمیان اقتصادی ترقی اور باہمی تعاون کے فروغ، میڈیکل، زراعت، معیشت اور کاروباری امور پر تبادلہ خیال کیا گیا۔
یہ بھی پڑھیں: ویمنز ایشیا کپ: پاکستان ویمن ٹیم دبئی روانہ، بھارت سے ٹاکرا 5 ستمبر کو ہوگا
مریم نواز شریف اور ہی ژونگ یو نے عوامی سطح پر روابط بڑھانے کے لیے پیپل ٹو پیپل ایکسچینج پروگرام پر بھی تفصیلی گفتگو کی، جبکہ پاکستانی طلبہ کے لیے آن لائن تکنیکی معاونت کی تجویز کا جائزہ لیا گیا۔مریم نواز شریف نے کہا کہ پنجاب اور شین جیانگ کے درمیان زراعت، صنعت، ٹیکنالوجی اور بنیادی ڈھانچے کے شعبوں میں تعاون مزید بڑھایا جائے گا۔وزیراعلیٰ پنجاب نے پانی کی کمی کا شکار علاقوں میں بہتر فصلوں کے حصول کے لیے واٹر ایفیشنٹ ٹیکنالوجی، ڈرپ اریگیشن اور عمدہ بیج کے استعمال میں باہمی تعاون کی پیشکش کی۔انہوں نے کہا کہ قحط زدہ اور خشک علاقوں میں جدید سائنسی طریقوں سے پانی کی کمی پوری کرنے کے لیے چین کے تجربات سے استفادہ کیا جائے گا، جبکہ آبی ذخائر کے تحفظ کے لیے پنجاب کے مختلف علاقوں میں چین کے اشتراک سے پائلٹ پراجیکٹس بھی شروع کیے جاسکتے ہیں۔مریم نواز شریف نے کہا کہ پنجاب کو پاکستان کی فوڈ باسکٹ ہونے کا اعزاز حاصل ہے، مؤثر اقدامات اور بہتر گورننس سے غربت اور محرومی کا ازالہ کیا جارہا ہے۔انہوں نے کہا کہ قابلِ تجدید توانائی کے شعبے پنجاب کی ترجیحات میں شامل ہیں جبکہ صوبے کے تعلیمی اداروں میں تکنیکی تعلیم کے فروغ پر بھی خصوصی توجہ دی جارہی ہے۔وزیراعلیٰ پنجاب نے ارمچی میں چھٹے بین الاقوامی میڈیا ٹور کے اقدام کو بھی سراہا۔
