انقرہ (پاک ترک نیوز )ترکیہ کے شہر انقرہ سے شانلی عرفہ جانے والی فضائی کمپنی کی پرواز میں مبینہ دھماکا خیز مواد کی موجودگی سے متعلق ایک تحریر ملنے کے بعد سکیورٹی حکام کو فوری طور پر متحرک کردیا گیا۔
پرواز نمبر 4180 نے مقامی وقت کے مطابق شام سات بجے انقرہ سے اڑان بھری تھی، تاہم طیارے میں دھماکا خیز مواد سے متعلق اطلاع ملنے کے بعد اسے شانلی عرفہ کے ہوائی اڈے پر بحفاظت اتار لیا گیا۔
طیارہ رات آٹھ بج کر پانچ منٹ پر شانلی عرفہ کے ہوائی اڈے پر پہنچا۔
صوبائی گورنر حسن شلدک کے مطابق طیارے میں 136 مسافر اور عملے کے 7 ارکان سوار تھے۔
حکام نے طیارے کے اترتے ہی مسافروں اور عملے کو بحفاظت باہر نکال لیا جبکہ ہوائی اڈے پر سکیورٹی کے انتہائی سخت انتظامات کیے گئے۔
سکیورٹی اہلکاروں نے طیارے کی مکمل تلاشی کا عمل شروع کردیا تاکہ مبینہ دھماکا خیز مواد کی موجودگی یا عدم موجودگی کا تعین کیا جاسکے۔
گورنر حسن شلدک کے مطابق تمام ضروری حفاظتی اقدامات کیے گئے ہیں اور سکیورٹی ادارے واقعے کی تحقیقات جاری رکھے ہوئے ہیں۔
حکام کا کہنا ہے کہ واقعے کے حوالے سے سکیورٹی جائزہ مکمل ہونے تک مزید تفصیلات سامنے آنے کا انتظار کیا جارہا ہے۔
