ایشیا کپ :پاک بھارت میچ کے جعلی ٹکٹ ہزاروں درہم میں فروخت ہونے لگے

لاہور( پاک ترک نیوز) ایشیا کپ میں پاک بھارت میچ کے جعلی ٹکٹ 11 ہزار درہم میں فروخت ہونے لگے ہیں۔
تفصیلات کے مطابق آئندہ ماہ یو اے ای میں شیڈول ایشیائی ایونٹ کی ٹکٹوں کا باضابطہ اعلان تو ابھی تک نہیں ہوا، مگر یو اے ای میں جعلی ٹکٹوں کی فروخت زور پکڑ گئی۔
خلیجی اخبار کے مطابق گوگل پر تلاش کرنے پر متعدد مشتبہ ویب سائٹس سامنے آئیں، ان میں ایک نے وی آئی پی پاس 11ہزار درہم میں فروخت کے لیے پیش کیا جبکہ عام ٹکٹ 1500درہم سے زائد قیمت پر بیچے جا رہے ہیں۔
واضح رہے کہ پاکستان اور بھارت کے درمیان میچ 14 ستمبر کو کھیلا جائے گا جس کے لیے شائقین بے چینی سے ٹکٹوں کا انتظار کر رہے ہیں۔
حکام نے خبردار کیا کہ جعلی ویب سائٹس سے ہوشیار رہیں اور صرف آفیشل ذرائع سے ہی ٹکٹ خریدیں۔ عوام کو مشورہ دیا گیا ہے کہ دھوکے بازی سے بچنے کے لیے مشتبہ لنکس سے پرہیز کریں۔