امریکا شدید برفانی موسم کی لپیٹ میں، سردی کے ریکارڈ قائم

واشنگٹن:(پاک ترک نیوز)امریکا میں شدید سردی اور طوفانی برفباری نے نظامِ زندگی مفلوج کر دیا ہے، جہاں مختلف ریاستوں میں پیش آنے والے حادثات کے نتیجے میں ہلاکتوں کی تعداد 65 تک پہنچ چکی ہے۔
غیر معمولی موسم نے زمینی، فضائی اور شہری سہولیات کو بری طرح متاثر کیا ہے۔امریکی ذرائع ابلاغ کے مطابق ملک کے مشرقی حصوں میں درجہ حرارت خطرناک حد تک گر چکا ہے، جس کے باعث سڑکیں برف سے ڈھک گئیں، ٹریفک معطل ہو گئی اور روزمرہ سرگرمیاں شدید متاثر ہو رہی ہیں۔
محکمہ موسمیات کے اعداد و شمار کے مطابق شکاگو میں درجہ حرارت منفی 14 جبکہ کلیولینڈ میں منفی 11 ڈگری سینٹی گریڈ تک ریکارڈ کیا گیا، جو کئی برسوں کے سردی کے ریکارڈ توڑنے کے مترادف ہے۔ٹی
نیسی اور مسیسیپی سمیت متعدد ریاستوں میں مسلسل برفباری کے باعث بجلی کا نظام بھی درہم برہم ہو گیا، جہاں ایک لاکھ سے زائد صارفین کو طویل دورانیے کی لوڈشیڈنگ کا سامنا ہے، جس سے شدید سردی میں عوام کی مشکلات مزید بڑھ گئی ہیں۔سخت موسمی حالات نے فضائی سفر کو بھی بری طرح متاثر کیا ہے۔
رپورٹس کے مطابق امریکن ایئر لائنز کی سینکڑوں پروازیں منسوخ جبکہ ہزار سے زائد پروازیں تاخیر کا شکار ہو چکی ہیں۔ ڈیلس فورٹ ورتھ سمیت کئی بڑے ہوائی اڈوں پر فلائٹ آپریشن شدید دباؤ میں ہے۔
صورتحال سے نمٹنے کے لیے بعض ایئر لائنز نے عملے کو اضافی ڈیوٹیاں انجام دینے پر مراعات اور اضافی معاوضے کی پیشکش کی ہے تاکہ پروازوں کی بحالی ممکن بنائی جا سکے۔محکمہ موسمیات نے خبردار کیا ہے کہ نیویارک، نیو جرسی اور ملحقہ علاقوں میں شدید سرد ہوائیں چلنے کا امکان ہے، جبکہ یہ سردی کی لہر آئندہ ہفتے تک برقرار رہ سکتی ہے۔
حکام نے شہریوں سے اپیل کی ہے کہ غیر ضروری سفر سے گریز کریں، حفاظتی ہدایات پر عمل کریں اور ہنگامی صورتحال میں مقامی اداروں سے رابطے میں رہیں تاکہ مزید جانی و مالی نقصان سے بچا جا سکے۔