لاہور( پاک ترک نیوز) دنیا بھر میں چھوٹے اور موبائل گھروں کا رجحان تیزی سے بڑھ رہا ہے، اسی سلسلے میں پیٹیٹ پیلیکن نامی ننھا گھر صرف 128 مربع فٹ رقبے میں چار افراد کے قیام کی گنجائش فراہم کرتا ہے۔یہ گھر 16 فٹ طویل ڈبل ایکسل ٹریلر پر تیار کیا گیا ہے، جسے گاڑی کے ذریعے ایک جگہ سے دوسری جگہ منتقل کیا جاسکتا ہے۔ گھر کے بیرونی حصے پر سفید بورڈ اینڈ بیٹن سائڈنگ جبکہ چھت پر دھاتی شیٹ استعمال کی گئی ہے۔
گھر کے باہر سامان رکھنے کے لیے اسٹوریج باکس بھی موجود ہے، جہاں گیس سلنڈر اور دیگر ضروری اشیا رکھی جاسکتی ہیں۔شیشے کے دروازے سے داخل ہوتے ہی چھوٹا مگر کارآمد لِونگ روم موجود ہے۔ کمرے میں صوفہ بیڈ بنایا گیا ہے، جس کے نیچے سے اضافی بیڈ نکالا جاسکتا ہے اور اس پر مہمانوں کے لیے مزید دو افراد کے سونے کی گنجائش پیدا ہوجاتی ہے۔
لِونگ روم میں ٹی وی، اضافی نشستیں اور منی اسپلٹ ایئر کنڈیشننگ سسٹم بھی نصب ہے۔گھر کے 128 مربع فٹ کے اوپن پلان میں لِونگ روم براہ راست کچن سے منسلک ہے۔ کچن کو گیلری اسٹائل میں بنایا گیا ہے، جہاں دونوں جانب کیبنٹس موجود ہیں۔کچن میں دو برنر والا گیس چولہا، سنک، مائیکرو ویو اوون اور مکمل سائز کا فریج اور فریزر بھی موجود ہے۔
یہ بھی پڑھیں: نیشنل سیونگز نے صرف 7 ہفتوں میں 313 ارب روپے کا ہدف حاصل کرلیا
کچن کے ساتھ ہی چھوٹا سا باتھ روم بنایا گیا ہے، جس میں واک اِن شاور اور ٹوائلٹ شامل ہیں۔پیٹیٹ پیلیکن میں ایک بیڈروم بھی ہے، جس تک سیڑھیوں کے ذریعے پہنچا جاسکتا ہے۔ یہ لوفت طرز کا کمرہ ہے، جہاں ڈبل بیڈ کی گنجائش موجود ہے۔ کم چھت کے باعث جگہ محدود ہے جبکہ حفاظت کے لیے ریلنگ بھی نصب کی گئی ہے۔
ماہرین کے مطابق یہ گھر مستقل طور پر چار افراد کی رہائش کے لیے موزوں نہیں، تاہم مختصر سفر، چھٹیوں یا مہمانوں کے قیام کے لیے اسے عملی آپشن قرار دیا جارہا ہے۔پیٹیٹ پیلیکن اس وقت امریکی ریاست نارتھ کیرولائنا میں 60 ہزار ڈالر میں فروخت کے لیے دستیاب ہے۔
