اسلام آباد ( پاک ترک نیوز) وزیرا طلاعات عطا تارڑ کا کہنا ہےسکیورٹی فورسز کی کاروائیوں میں 26 بھارتی سپانسرڈ خارجی ہلاک کیے گئے۔ دہشت گردوں کے ٹھکانوں کو مستند خفیہ اطلاعات کی بنیاد پر ٹارگٹ کیا گیا۔
وزیر اطلاعات نے سوشل میڈیا ایپ ایکس پر پیغام میں لکھا دہشت گردوں کمانڈر علیم خان اور کمانڈر اختر محمد جانی خیل کے ٹریننگ سینٹر، خفیہ ٹھکانے تباہ کیے گئے۔
عطا تارڑ نے لکھا پاکستان میں حالیہ دہشت گردی کے واقعات کے بعد پاک۔افغان سرحدی علاقوں میں فتنہ الخوارج کے سرغنوں اور منصوبہ سازوں کے ٹھکانوں اور محفوظ پناہ گاہوں کے خلاف انتہائی درست اور محدود نوعیت کی کارروائیاں کی گئیں۔
ان کارروائیوں میں بھارت کے سرپرست فتنہ الخوارج کے 26 دہشت گرد ہلاک ہوئے۔
وزیر اطلاعات عطا تارڑ نے کہا معتبر انٹیلی جنس اطلاعات کی بنیاد پر دہشت گردوں کے کیمپوں اور ٹھکانوں کو نہایت درستگی اور احتیاط کے ساتھ نشانہ بنایا گیا۔ چار اہداف مکمل طور پر تباہ کر دیے گئے، ان میں ایک تربیتی مرکز، ایک محفوظ ٹھکانہ، اسلحہ کا ذخیرہ، اور فتنہ الخوارج کے کمانڈروں علیم خان خوشحالی، اختر محمد جانی خیل کے مراکز شامل تھے۔
عطا تارڑ نے کہا پاکستان نے ہمیشہ خطے میں امن اور استحکام کے فروغ کے لیے کوششیں کی ہیں۔اپنے شہریوں کے جان و مال کا تحفظ ہماری اولین ترجیح ہے۔ نیشنل ایکشن پلان کی وفاقی ایپکس کمیٹی کی منظوری سے عزمِ استحکام کے تحت پاکستان کی سکیورٹی فورسز اور قانون نافذ کرنے والے اداروں کی انسدادِ دہشت گردی مہم پوری قوت کے ساتھ جاری رہے گی۔مہم کا مقصد ملک سے بیرونی سرپرستی اور حمایت یافتہ دہشت گردی کے ناسور کا مکمل خاتمہ ہے۔
