اسلام آباد (پاک ترک نیوز )جمعیت علمائے اسلام کے سربراہ مولانا فضل الرحمان نے کہا ہے کہ حکومت نے آئندہ کے لیے مذاکرات کی گنجائش نہیں چھوڑی، تاہم سیاسی معاملات کو بات چیت کے ذریعے حل کرنے کی ضرورت ہے۔
اپوزیشن رہنماؤں کے ہمراہ پریس کانفرنس کرتے ہوئے مولانا فضل الرحمان نے کہا کہ مذاکرات سیاسی اور شائستہ لب و لہجے میں ہونے چاہئیں۔
انہوں نے کہا کہ حکومت اور اپوزیشن کے درمیان مذاکرات ہوئے ہیں، جے یو آئی ان مذاکرات کا حصہ نہیں تھی، تاہم اسے مذاکرات سے کوئی اختلاف نہیں۔
مولانا فضل الرحمان نے کہا کہ ملک کو سیاسی طور پر میانہ روی کی جانب لے جانے کی ضرورت ہے۔ آل پارٹیز کانفرنس کی تجویز سامنے آئی ہے، جس پر مشاورت کے بعد مشترکہ حکمت عملی طے کی جائے گی۔
ان کا کہنا تھا کہ تمام جماعتیں اپنی اپنی قیادت سے مشاورت کے بعد مشترکہ ایجنڈے کے تحت آل پارٹیز کانفرنس میں شریک ہوں گی۔
مولانا فضل الرحمان نے کہا کہ ہم آئین اور ریاست کے ساتھ کھڑے ہیں اور تمام سیاسی جماعتیں محب وطن ہیں۔
انہوں نے کہا کہ جو کچھ سامنے آیا ہے، اس کے مطابق حکومت نے آئندہ مذاکرات کے لیے گنجائش نہیں چھوڑی، تاہم جب بھی بات چیت ہو، اسے سیاسی انداز اور مناسب لب و لہجے میں آگے بڑھایا جانا چاہیے۔
جے یو آئی سربراہ کا کہنا تھا کہ سیاسی جماعتوں کو احتجاج کا جمہوری حق حاصل ہے۔ ان کا کہنا تھا کہ اگر تحریک انصاف اسلام آباد آکر اپنا احتجاج ریکارڈ کرانا چاہتی ہے تو اس میں رکاوٹ نہیں ڈالنی چاہیے
