اسلام آباد (پاک ترک نیوز )وزیراعظم شہباز شریف نے خیبر پختونخوا کے معاملات کی نگرانی کے لیے 11 رکنی مانیٹرنگ کمیٹی قائم کر دی ہے، ذرائع کے مطابق نائب وزیراعظم اسحاق ڈار کو کمیٹی کا کنوینئر مقرر کیا گیا ہے۔
ذرائع کا کہنا ہے کہ کمیٹی صوبے میں طرز حکمرانی، امن و امان اور روزمرہ انتظامی امور کی نگرانی کرے گی۔
کمیٹی میں رانا ثنا اللہ، اعظم نذیر تارڑ، احسن اقبال، امیر مقام اور طارق فضل چوہدری شامل ہیں، جبکہ محسن نقوی اور خالد مقبول صدیقی سمیت اتحادی جماعتوں کے نمائندے بھی مشاورتی عمل کا حصہ ہوں گے۔
ذرائع کے مطابق پاکستان پیپلز پارٹی، بلوچستان عوامی پارٹی اور استحکام پاکستان پارٹی کا ایک ایک نمائندہ بھی کمیٹی میں شامل ہوگا۔
نائب وزیراعظم اسحاق ڈار کی سربراہی میں خیبر پختونخوا سے متعلق پالیسی کمیٹی کا پہلا اجلاس بھی منعقد ہوا، جس میں محسن نقوی، رانا ثنا اللہ، طارق فضل چوہدری، امیر مقام اور اتحادی جماعتوں کے نمائندوں نے شرکت کی۔
ذرائع کے مطابق اجلاس میں خیبر پختونخوا میں ہنگامی حالت کے نفاذ کے بعد تشکیل دیے گئے انتظامی نظام کے لیے پالیسی رہنما اصول فراہم کیے گئے اور صوبے میں حکومتی امور، امن و امان اور انتظامی معاملات کی نگرانی کے طریقہ کار پر غور کیا گیا۔
خیبر پختونخوا کے امور کی نگرانی کے لیے وزیراعظم کی 11 رکنی کمیٹی قائم، اسحاق ڈار کنوینئر مقرر
