اسلام آباد(پاک ترک نیوز )صدرِ مملکت نے مختلف شعبوں میں نمایاں خدمات انجام دینے والے 355 افراد کو سول ایوارڈز دینے کی منظوری دے دی۔
صدرِ مملکت کی منظوری کے تحت نائب وزیراعظم و وزیر خارجہ اسحاق ڈار اور وفاقی وزیر داخلہ محسن نقوی کو نشانِ امتیاز دینے کا فیصلہ کیا گیا ہے۔
وزیر خزانہ محمد اورنگزیب، وفاقی وزیر احد چیمہ اور وزیر مملکت بلال اظہر کیانی کو بھی نشانِ امتیاز سے نوازا جائے گا۔
ڈی جی آئی بی فواد اسداللہ خان، اٹارنی جنرل منصور عثمان اعوان اور سیکرٹری ایف بی آر راشد لنگڑیال کو ہلالِ امتیاز دینے کی منظوری دی گئی ہے۔
سیکرٹری داخلہ پنجاب احمد جاوید قاضی اور ایم ڈی پنجاب سیف سٹیز اتھارٹی احسن یونس کو ستارۂ امتیاز سے نوازا جائے گا، جبکہ ترکیہ کے وزیر خارجہ حاقان فیدان کو بھی ستارۂ امتیاز عطا کیا جائے گا۔
بیرسٹر اسامہ مالک کو قانونی تعلیم اور نظامِ انصاف کی بہتری کے لیے غیر معمولی عوامی خدمات کے اعتراف میں ستارۂ امتیاز دینے کی منظوری دی گئی ہے۔ انہوں نے ڈائریکٹوریٹ آف لیگل ایجوکیشن کی سربراہی کے دوران قانونی تعلیم کے نظام میں متعدد اہم اصلاحات متعارف کرائیں، جن میں ایل ایل بی کے جدید نصاب کی تیاری اور جعلی و غیر فعال لا کالجز کے خلاف کارروائیاں شامل ہیں۔
فن و ثقافت کے شعبے میں نعت خواں فصیح الدین سہروردی، اداکارہ نشو بیگم، کامیڈین افتخار ٹھاکر اور گلوکارہ ترنم ناز کو ستارۂ امتیاز دینے کی منظوری دی گئی ہے۔
اداکار و اینکر نورالحسن اور گلوکار شیراز اپل کو تمغۂ امتیاز جبکہ اداکار محمود اسلم اور اداکارہ ثانیہ سعید کو تمغۂ حسنِ کارکردگی دینے کا فیصلہ کیا گیا ہے۔
کھیل کے شعبے میں باکسر محمد وسیم، اسکواش پلیئر نور زمان، بشیر بھولا پہلوان اور سلطان گولڈن کو پرائیڈ آف پرفارمنس سے نوازا جائے گا، جبکہ ایتھلیٹ فائقہ ریاض کو تمغۂ امتیاز دینے کی منظوری دی گئی ہے۔
صدرِ مملکت کی جانب سے سول ایوارڈز کی یہ منظوری مختلف شعبوں میں نمایاں قومی، عوامی، علمی، فنی اور کھیلوں کی خدمات کے اعتراف میں دی گئی ہے۔
