استنبول(پاک ترک نیوز )ترکیہ نے غزہ امدادی فلوٹیلا روکنے پر نیتن یاہو کیخلاف بین الاقوامی وارنٹ گرفتاری جاری کر دیا،نیتن یاہو کے خلاف انٹرپول ریڈ نوٹس جاری کرنے کا مطالبہ کر دیا۔
ترک وزیر انصاف کے مطابق استنبول کی عدالت میں نیتن یاہو سمیت 35 ملزمان کے خلاف باقاعدہ عدالتی کارروائی جاری ہے۔ترک وزارت انصاف کی درخواست پر اسرائیلی قیادت کے خلاف انٹرپول ریڈ نوٹس جاری کرنے کے لیے کارروائی بھی شروع کر دی گئی ہے۔
ترک حکام کے مطابق نیتن یاہو پر انسانیت کے خلاف جرائم، نسل کشی اور کارکنوں پر تشدد سمیت سنگین الزامات عائد کیے گئے ہیں۔مقدمے میں بین الاقوامی پانیوں میں امدادی جہازوں پر مسلح مداخلت اور مبینہ ہائی جیکنگ کے الزامات بھی شامل ہیں۔
ترک وزیر انصاف کا کہنا ہے کہ غزہ میں ہونے والے جرائم پر پردہ ڈالنے یا ذمہ داروں کو سزا سے بچنے کی اجازت نہیں دی جائے گی۔انہوں نے کہا کہ ترکیہ مجرموں کو کٹہرے میں لانے کے لیے قومی اور بین الاقوامی قانون کے تمام دستیاب ذرائع استعمال کرے گا۔
ترک حکام کے مطابق استنبول کی عدالت نے رواں سال 14 جولائی کو نسل کشی کے الزامات کے معاملے میں نیتن یاہو کے وارنٹ گرفتاری بھی جاری کیے تھے۔
