دبئی: (پاک ترک نیوز)انٹرنیشنل کرکٹ کونسل (آئی سی سی) نے مینز ٹی 20 ورلڈ کپ 2026 کے طے شدہ شیڈول کو برقرار رکھنے کا حتمی فیصلہ کرتے ہوئے واضح کیا ہے کہ بنگلہ دیش کے تمام میچز بھارت میں ہی ہوں گے۔
یہ فیصلہ بدھ، 21 جنوری کو ویڈیو لنک کے ذریعے منعقد ہونے والے آئی سی سی بورڈ اجلاس کے بعد سامنے آیا۔یہ اجلاس اس وقت بلایا گیا جب بنگلہ دیش کرکٹ بورڈ (بی سی بی) نے سیکیورٹی خدشات کی بنیاد پر اپنے میچز بھارت کے بجائے سری لنکا منتقل کرنے کی درخواست کی۔ تاہم آئی سی سی کے مطابق اجلاس میں آزاد اور معتبر اداروں کی سیکیورٹی رپورٹس سمیت تمام دستیاب اسیسمنٹس کا تفصیلی جائزہ لیا گیا، جن میں کسی بھی مقام پر بنگلہ دیشی کھلاڑیوں، آفیشلز، میڈیا یا شائقین کے لیے قابلِ تصدیق خطرے کی نشاندہی نہیں ہوئی۔
آئی سی سی نے اپنے مؤقف میں کہا کہ ٹورنامنٹ کے آغاز میں محدود وقت باقی ہونے کے باعث شیڈول میں تبدیلی عملی طور پر ممکن نہیں، اور بغیر کسی ٹھوس سیکیورٹی بنیاد کے ایسی تبدیلی مستقبل کے آئی سی سی ایونٹس کے لیے ایک خطرناک مثال بن سکتی ہے، جو ادارے کی غیر جانبداری اور عالمی ساکھ کو متاثر کرے گی۔کونسل کے مطابق بنگلہ دیش کرکٹ بورڈ کے تحفظات دور کرنے کے لیے متعدد مواقع پر رابطہ کیا گیا۔
بی سی بی کو ایونٹ کے جامع سیکیورٹی پلان، میزبان ملک میں وفاقی و ریاستی قانون نافذ کرنے والے اداروں کی معاونت، اور وینیو لیول سیکیورٹی انتظامات سے متعلق مکمل بریفنگ دی گئی۔
آئی سی سی ترجمان نے بتایا کہ حالیہ ہفتوں میں مسلسل رابطوں کے باوجود کوئی ایسا ثبوت سامنے نہیں آیا جو میچز کی منتقلی کو ضروری ثابت کرتا ہو۔آئی سی سی نے یہ بھی نشاندہی کی کہ بنگلہ دیش کی جانب سے شرکت کو ایک کھلاڑی کے ڈومیسٹک لیگ سے متعلق معاملے سے جوڑا گیا، جس کا نہ تو ٹورنامنٹ کی سیکیورٹی سے براہِ راست تعلق ہے اور نہ ہی ایونٹ کی شرائط سے۔
عالمی کرکٹ باڈی نے واضح کیا کہ وینیوز اور میچ شیڈول کے فیصلے تمام 20 شریک ٹیموں کے لیے یکساں اصولوں، آزاد سیکیورٹی رپورٹس اور میزبان ممالک کی تحریری ضمانتوں کی بنیاد پر کیے جاتے ہیں۔ بغیر کسی مضبوط وجہ کے میچز کی منتقلی نہ صرف دیگر ٹیموں اور شائقین کے لیے انتظامی مسائل پیدا کرے گی بلکہ مستقبل میں مزید تنازعات کو بھی جنم دے سکتی ہے۔
آئی سی سی نے اس عزم کا اعادہ کیا کہ وہ شفافیت، نیک نیتی اور عالمی کرکٹ کے مجموعی مفادات کے تحفظ کے لیے اپنے فیصلوں میں یکساں معیار برقرار رکھے گی۔
واضح رہے کہ بنگلہ دیش نے حالیہ عرصے میں بھارت میں سیکیورٹی صورتحال پر تحفظات ظاہر کیے تھے۔ یہ کشیدگی اس وقت بڑھی جب آئی پی ایل کی ٹیم کولکتہ نائٹ رائیڈرز نے فاسٹ بولر مستفیض الرحمان کو مبینہ دھمکیوں کے بعد لیگ سے الگ کر دیا، جس کے بعد دونوں کرکٹ بورڈز کے تعلقات میں تناؤ پیدا ہوا اور بی سی بی نے ہنگامی اجلاس میں بھارت نہ جانے پر غور کیا تھا۔ تاہم آئی سی سی کے حالیہ فیصلے کے بعد ورلڈ کپ 2026 اپنے طے شدہ شیڈول کے مطابق ہی کھیلا جائے گا۔
