واشنگٹن ( پاک ترک نیوز) امریکی صدر ڈونلڈ ٹرمپ نے کہا ہے کہ امریکی صارفین کی جانب سے پٹرول کی بلند قیمتوں کی ادائیگی دنیا اور امریکا کو محفوظ رکھنے کے لیے ایک معمولی قیمت ہے۔نیبراسکا کے شہر گرینڈ آئی لینڈ میں انتخابی ریلی سے خطاب کرتے ہوئے ڈونلڈ ٹرمپ نے دعویٰ کیا کہ امریکا میں پٹرول کی قیمتیں جلد کم ہو کر ایک ڈالر 85 سینٹ فی گیلن سے بھی نیچے آ جائیں گی۔ٹرمپ کے مطابق پٹرول کی قیمتوں میں یہ کمی 3 نومبر کو ہونے والے وسط مدتی انتخابات سے پہلے یا انتخابات کے فوراً بعد ممکن ہے۔
امریکی صدر نے کہا کہ موجودہ تیل کی قیمتیں سابق صدر جو بائیڈن کی انتظامیہ کے دور کے مقابلے میں کم ہیں۔ڈونلڈ ٹرمپ نے دعویٰ کیا کہ امریکا دنیا کو ممکنہ طور پر بدترین سانحات میں سے ایک سے بچانے کے لیے اقدامات کر رہا ہے۔انہوں نے ایک بار پھر واضح کیا کہ امریکا ایران کو جوہری ہتھیار حاصل کرنے کی اجازت نہیں دے گا۔
ٹرمپ کا کہنا تھا کہ عالمی سلامتی کے تحفظ کے لیے امریکا کی جانب سے اٹھائے جانے والے اقدامات کی کچھ قیمت امریکی صارفین کو ادا کرنا پڑ رہی ہے، تاہم ان کے بقول یہ قیمت دنیا اور امریکا کو محفوظ رکھنے کے مقابلے میں معمولی ہے۔
