واشنگٹن (پاک ترک نیوز )امریکی وزیر خزانہ اسکاٹ بیسنٹ نے ایران کے خلاف سخت زبان استعمال کرتے ہوئے کہا ہے کہ ایرانی حکومت کے خلاف اندرونی بغاوت کا وقت آچکا ہے، بصورتِ دیگر دنیا کو سنگین نتائج کا سامنا کرنے کے لیے تیار رہنا ہوگا۔
اسکاٹ بیسنٹ نے چین کو ایرانی تیل کی فراہمی کے معاملے پر بھی سخت اقدامات کی دھمکی دیتے ہوئے کہا کہ چین کو ایرانی تیل کی فراہمی روکنے کے لیے بڑے پیمانے پر سخت عسکری اور اقتصادی اقدامات کا نیا باب کھلنے والا ہے۔
امریکی وزیر خزانہ نے برطانوی جریدے فنانشل ٹائمز کو بھی شدید تنقید کا نشانہ بنایا اور الزام عائد کیا کہ یہ امریکہ دشمن، کاروبار دشمن اور مغربی اقدار کا کھلا مخالف ہے۔
اسکاٹ بیسنٹ نے وال اسٹریٹ جرنل کو بھی معاشی جریدہ ماننے سے انکار کرتے ہوئے طنزیہ انداز اپنایا اور کہا کہ اس اخبار میں ان کا مطالعہ صرف کتابوں کے تبصرے پڑھنے تک محدود ہے۔
امریکی وزیر خزانہ کے مطابق اصل مسئلہ معاشی برائی نہیں بلکہ منفی میڈیا کوریج ہے۔
نیوز چینل سے گفتگو میں اسکاٹ بیسنٹ نے میڈیا پر تنقید کرتے ہوئے کہا کہ اب ’فیک نیوز‘ کی اصطلاح بھی متعصب صحافت کے گھناؤنے کردار کو بیان کرنے کے لیے چھوٹی پڑ چکی ہے۔
