تہران (پاک ترک نیوز )ایران کے پاسداران انقلاب کے ترجمان بریگیڈیئر جنرل حسین محمدی نے امریکی صدر ڈونلڈ ٹرمپ کے اس دعوے کو سختی سے مسترد کر دیا ہے جس میں انہوں نے پاسداران انقلاب کے ساتھ خفیہ مذاکرات کی بات کی تھی۔
سرکاری خبر رساں ایجنسی ‘تسنیم’ سے گفتگو کرتے ہوئے بریگیڈیئر جنرل حسین محمدی نے واضح کیا کہ، ’پاسداران انقلاب کے حکام اور امریکیوں کے درمیان کسی قسم کے کوئی مذاکرات نہیں ہو رہے‘۔
انہوں نے امریکی صدر کے دعوے پر کڑی تنقید کرتے ہوئے کہا کہ’ٹرمپ کا یہ جھوٹ محض ان کی وہ خام خیالیاں ہیں جن کا سامنا وہ جنگ میں ہونے والی شکست اور مایوسی کے نتیجے میں پیدا ہونے والے وہم اور ڈراؤنے خوابوں کے باعث کر رہے ہیں‘۔
ترجمان نے امریکا کی ماضی کی پالیسیوں کا حوالہ دیتے ہوئے کہا کہ ’امریکا کی جانب سے وعدہ خلافیوں اور معاہدوں کی بار بار خلاف ورزیوں کے تلخ تجربات کے پیشِ نظر فی الحال اس میدان میں بھی امریکیوں کے ساتھ کوئی بات چیت نہیں ہو رہی ہے‘۔
