اسلام آباد ( پاک ترک نیوز) ترجمان دفتر خارجہ کا کہنا ہے پاکستان خطے میں امن کے لیے کردار ادا کر رہا ہے ، امریکی قیادت نے امن کے لیے پاکستان کی کاوشوں کو سراہا ۔
امریکی وزیر خارجہ مارکو روبیو نے پاکستان کے ثالثی کے کردار کی تعریف کی۔ طاہر حسین اندرابی نے ہفتہ وار نیوز کانفرنس میں کہا گزشتہ دو ہفتےسفارتی سرگرمیوں کے حوالےسے بھرپور رہے ،وزیراعظم شہبازشریف نے بیجنگ میں چینی قیادت سے ملاقاتیں کیں۔ وزیراعظم شہباز شریف کو ایرانی صدر نے ٹیلی فون کیا۔وزیراعظم کی کویت کے ولی عہد اور ملائشین ہم منصب سے بھی ٹیلیفونک گفتگو ہوئی ہے۔نائب وزیراعظم اسحاق ڈار امریکی وزیر خارجہ مارکو روبیو سے ملے۔
پاکستان پر انٹیلیجنس شئیرنگ کا الزام قیام امن کے عمل کو ڈی ریل کرنے کی کوشش ہے۔پاکستان امریکہ کی جانب سے اسرائیل لبنان جنگ بندی کی کوششوں کا خیرمقدم کرتا ہے۔پاکستان فلسطین پر اسرائیلی جارحیت کی مذمت کرتا ہے۔ ابراہام اکارڈ پر پاکستان کا موقف بلکل واضح ہے، پاکستان کا موقف پائیدار خودمختار فلسطینی ریاست کے قیام سے منسلک ہے ،بھارت پانی کو بطور ہتھیار استعمال کر رہاہے ، سلال ڈیم کی ڈی سلٹنگ کا معاملہ تشویش ناک ہے ۔ معاہدے کے تحت ڈیم کی ڈی سلٹنگ کی اجازت نہیں ہے ، پاکستان کی فوڈ سیکورٹی کو خطرے میں ڈالنا جنوبی ایشیا کو مزید غیر مستحکم کرے گا۔
جموں کشمیر کا معاملہ بین الاقوامی سطح پر تسلیم شدہ تنازع ہے، کسی بین الاقوامی شخصیت کا مقبوضہ کشمیر کا دورہ صورتحال کو تبدیل نہیں کر سکتا، ترجمان دفتر خارجہ نے مزید کہا روس اور طالبان رجیم کے معاہدے پر کچھ کہنا فی الحال قبل از وقت ہو گا، پاکستان افغان سرزمین سے ہونے والی دہشت گردی کا نشانہ بن رہا ہے ۔ پاکستان اپنے شہریوں کے تحفظ کے لئے جائز قانونی اقدامات میں حق بجانب ہے
پاکستان خطے میں امن کے لیے کردار ادا کر رہا ہے ،ترجمان دفتر خارجہ
