امریکی اڈے نشانے پر، حملہ ہوا تو سخت جواب ہوگا: ایران کی دو ٹوک وارننگ

تہران: (پاک ترک نیوز)ایران کی اعلیٰ فوجی قیادت نے امریکا کو واضح اور سخت پیغام دیتے ہوئے خبردار کیا ہے کہ کسی بھی ممکنہ حملے کی صورت میں فوری اور بھرپور ردعمل دیا جائے گا۔
ایرانی سرکاری میڈیا سے گفتگو کرتے ہوئے فوج کے ترجمان بریگیڈیئر جنرل محمد اکرمینیا نے کہا کہ خطے میں موجود امریکی فوجی تنصیبات اور طیارہ بردار بحری جہاز ایران کی دفاعی حکمتِ عملی کے دائرے میں آتے ہیں۔
انہوں نے بتایا کہ امریکی اڈے ایران کے درمیانے فاصلے کے میزائلوں کی حدود میں ہیں اور مسلح افواج ہر طرح کی صورتحال سے نمٹنے کے لیے مکمل تیاری میں ہیں۔
ایرانی فوجی حکام کا کہنا تھا کہ یہ دفاعی اقدامات کسی نئی کشیدگی کو جنم دینے کے لیے نہیں بلکہ قومی سلامتی کے تحفظ کے لیے کیے گئے ہیں۔
ان کے مطابق ایران اپنی خودمختاری پر کسی بھی حملے کو برداشت نہیں کرے گا۔فوجی قیادت نے واضح کیا کہ اگر ایران کے خلاف کوئی جارحانہ قدم اٹھایا گیا تو اس کا جواب فوری ہوگا اور کسی قسم کی تاخیر نہیں کی جائے گی۔
دوسری جانب عالمی مبصرین خطے میں بڑھتی ہوئی بیان بازی پر تشویش کا اظہار کر رہے ہیں، تاہم ایران کا مؤقف ہے کہ اس کا ہر ردعمل حالات کے مطابق اور دفاعی نوعیت کا ہوگا۔