تہران: (پاک ترک نیوز)ایران نے امریکا اور اسرائیل کو دوٹوک پیغام دیتے ہوئے خبردار کیا ہے کہ اس کی سرزمین پر کسی بھی نوعیت کی فوجی کارروائی کو براہِ راست جنگ سمجھا جائے گا، چاہے حملہ محدود ہو یا کسی مخصوص ہدف تک ہی کیوں نہ رکھا جائے۔
ایرانی حکام کے مطابق خطے میں امریکی فوجی سرگرمیوں میں اضافے کے بعد ملک بھر میں سیکیورٹی الرٹ نافذ کر دیا گیا ہے، جبکہ مسلح افواج کو ہر ممکن صورتحال سے نمٹنے کے لیے مکمل طور پر تیار رہنے کی ہدایات جاری کر دی گئی ہیں۔
حکام کا کہنا ہے کہ ایران کسی بھی جارحیت کو برداشت نہیں کرے گا اور ردِعمل فوری اور مؤثر ہوگا۔پاسدارانِ انقلاب کے چیف کمانڈر جنرل محمد پاکپور نے اپنے حالیہ بیان میں کہا ہے کہ ایرانی افواج اعلیٰ ترین سطح پر الرٹ ہیں اور سپریم لیڈر آیت اللہ علی خامنہ ای کی ہدایات کے مطابق کسی بھی ہنگامی صورتحال میں فوری کارروائی کے لیے تیار ہیں۔
جنرل پاکپور کے مطابق ایران کی دفاعی تیاری محض بیانات تک محدود نہیں بلکہ عملی سطح پر بھی تمام یونٹس متحرک ہیں۔ ان کا کہنا تھا کہ دشمن قوتوں کو ماضی کے تصادمات سے سبق سیکھنا چاہیے، کیونکہ مستقبل میں کسی بھی غلط قدم کے نتائج کہیں زیادہ سنگین اور ناقابلِ تلافی ہو سکتے ہیں۔
ایرانی فوجی قیادت کا مؤقف ہے کہ حالیہ برسوں میں ایران نے اپنے دفاعی نظام، میزائل صلاحیت اور انٹیلی جنس نیٹ ورک کو نمایاں طور پر مضبوط کیا ہے، جس کے باعث ملک اپنی خودمختاری کے تحفظ کی بھرپور صلاحیت رکھتا ہے۔
بیان میں مزید کہا گیا کہ ایران کسی دباؤ، دھمکی یا طاقت کے استعمال کے سامنے جھکنے کا ارادہ نہیں رکھتا اور قومی سلامتی پر کوئی سمجھوتہ نہیں کیا جائے گا۔ ایرانی حکام نے واضح کیا کہ کسی بھی قسم کی مہم جوئی کا جواب سخت، فوری اور فیصلہ کن ہوگا۔
امریکا کی کسی بھی قسم کی مہم جوئی کا جواب سخت، فوری اور فیصلہ کن ہوگا:ایران
