اسلام آباد:(پاک ترک نیوز)سعودی عرب اور کویت سے تعلق رکھنے والے کے الیکٹرک کے سرمایہ کاروں نے پاکستان کے خلاف 2 ارب ڈالر کا بین الاقوامی ثالثی مقدمہ دائر کر دیا ہے۔
غیر ملکی سرمایہ کاروں کا مؤقف ہے کہ حکومتی مداخلت، واجب الادا رقوم کی عدم ادائیگی اور کے الیکٹرک کی فروخت کا 1.77 ارب ڈالر کا معاہدہ برسوں سے روکے جانے کے باعث انہیں شدید مالی نقصان اٹھانا پڑا۔
دی نیوز کی رپورٹ کے مطابق یہ مقدمہ 16 جنوری 2026 کو دائر کیا گیا۔یہ ثالثی کارروائی اسٹیپٹو انٹرنیشنل (یو کے) ایل ایل پی اور اومنیا اسٹریٹیجی ایل ایل پی کے ذریعے دائر کی گئی، جو 32 سعودی اداروں اور 5 کویتی کمپنیوں کی نمائندگی کر رہے ہیں۔
یہ سرمایہ کار بالواسطہ طور پر کے الیکٹرک میں 30.7 فیصد حصص کے مالک ہیں اور 2005 میں نجکاری کے بعد سے کمپنی کے بڑے شیئر ہولڈرز رہے ہیں۔
تنازع کی جڑیں اکتوبر 2016 میں ہونے والے اس معاہدے سے جڑی ہیں، جب سرمایہ کاروں نے کے الیکٹرک کے 66.4 فیصد حصص شنگھائی الیکٹرک پاور کمپنی کو فروخت کرنے پر اتفاق کیا تھا۔
اگرچہ اس سودے کو ابتدا میں پاکستانی ریگولیٹرز کی حمایت حاصل تھی، تاہم مبینہ طور پر بدلتی ہوئی ریگولیٹری شرائط، مختلف سرکاری اداروں کی متضاد ہدایات اور قومی سلامتی سمیت دیگر لازمی منظوریوں میں تاخیر کے باعث یہ معاہدہ آٹھ سال سے زائد عرصے تک تعطل کا شکار رہا۔
سرمایہ کاروں کا کہنا ہے کہ انہی تاخیروں کے باعث شنگھائی الیکٹرک نے معاہدے سے دستبرداری اختیار کی، جسے وہ بین الاقوامی قانون کے تحت بالواسطہ ضبطگی قرار دے رہے ہیں۔
ثالثی درخواست میں حکومت کی جانب سے واجب الادا رقوم کی عدم ادائیگی کا بھی ذکر کیا گیا ہے، جن میں کے الیکٹرک کو ملنے والی ٹیرف ڈیفرینشل سبسڈیز شامل ہیں، جو بعض معاملات میں تقریباً دو دہائیوں سے زیر التوا ہیں۔
سرمایہ کاروں کے مطابق ان بقایاجات نے کے الیکٹرک کے مالی بہاؤ کو شدید متاثر کیا، جبکہ سرکاری اداروں کی جانب سے تاخیر پر جرمانے عائد کیے جاتے رہے۔
مزید برآں، سرمایہ کاروں نے الزام عائد کیا ہے کہ حکومت نے نیپرا کی خودمختاری کو متاثر کرتے ہوئے کے الیکٹرک کے ملٹی ایئر ٹیرف فریم ورک کو سیاسی بنیادوں پر نشانہ بنایا۔
ان کے مطابق مئی 2025 میں جاری کیے گئے نیپرا کے حتمی ٹیرف نوٹیفکیشنز کو نافذ نہیں کیا گیا، طے شدہ معاملات کو دوبارہ کھولا گیا اور ایسے نظرثانی شدہ ٹیرف نافذ کیے گئے جو ان کے بقول ضبطی کے مترادف ہیں۔
سرمایہ کاروں کا دعویٰ ہے کہ ان اقدامات سے کے الیکٹرک کو سالانہ تقریباً 85 ارب روپے کا نقصان ہو سکتا ہے، جس سے کمپنی کی معاشی بقا خطرے میں پڑ سکتی ہے۔
درخواست میں یہ الزام بھی لگایا گیا ہے کہ بعض مقامی سرمایہ کاروں نے آف شور ڈھانچوں، خفیہ ملکیت میں تبدیلیوں اور ریگولیٹری خلاف ورزیوں کے ذریعے کے الیکٹرک پر قبضے کی کوشش کی، تاہم شکایات کے باوجود متعلقہ اداروں نے کوئی مؤثر کارروائی نہیں کی۔
اس کے علاوہ، سرمایہ کاروں نے سینرجیکو کے حصص کی فروخت سے حاصل ہونے والے 6 کروڑ 60 لاکھ ڈالر کی مبینہ غیر قانونی بیرونِ ملک منتقلی پر بھی سوال اٹھائے ہیں، جس کے بارے میں کہا گیا ہے کہ یہ رقم ریگولیٹری منظوری کے بغیر منتقل کی گئی، مگر بار بار نشاندہی کے باوجود حکام نے کوئی قدم نہیں اٹھایا۔
سرمایہ کاروں کا مؤقف ہے کہ پاکستان نے او آئی سی سرمایہ کاری معاہدے کی متعدد شقوں کی خلاف ورزی کی ہے، جن میں ضبطگی سے تحفظ، منصفانہ سلوک، رقوم کی آزاد منتقلی اور مؤثر قانونی چارہ جوئی تک رسائی شامل ہے۔
اس کے علاوہ انہوں نے بحرین اور سوئٹزرلینڈ کے ساتھ پاکستان کے دوطرفہ سرمایہ کاری معاہدوں کے تحت بھی تحفظات کا حوالہ دیا ہے۔اس مقدمے کے باعث پاکستان کو ایک بڑے قانونی چیلنج کا سامنا ہے، جس کے ملکی ریگولیٹری نظام اور غیر ملکی سرمایہ کاروں کے ساتھ تعلقات پر گہرے اثرات مرتب ہونے کا خدشہ ظاہر کیا جا رہا ہے۔
کے الیکٹرک تنازع: سعودی اور کویتی سرمایہ کاروں کا پاکستان کیخلاف 2 ارب ڈالر کا مقدمہ
