از: سہیل شہریار
چینی سائنسدانوںنے ایک مختصر مائیکرو ویو بیم فائر کرنے والے ہتھیار کا ایسا نظام تیارکر لیا ہے جو ایک منٹ کے اندر خلا میں موجود سیٹلائٹ کوبھسم کر سکتا ہے۔
چینی میڈیا کی رپورٹ کے مطابق چینی صوبہ شان زی کے شہرژان میںواقع انسٹی ٹیوٹ آف نیوکلیئر ٹیکنالوجی سے تعلق رکھنے والی ٹیم نے یہ نظام تیار کیا ہےجو پورے ایک منٹ تک انتہائی طاقتور 20 گیگا واٹ توانائی فراہم کر سکتا ہے۔جبکہ اس سے پہلے اسی طرح کے نظام صرف تین سیکنڈ سے زیادہ مسلسل فائرنگ کرنے کے قابل نہیں تھے۔ اس نظام کو ٹی پی جی 1000سیز کا نام دیا گیا ہے۔اور یہ ہائی پاور مائکروویو (ایچ پی ایم) ہتھیار کے لیے دنیا کا پہلا مختصر ڈرائیور ہے۔
ٹی پی جی 1000سیزصرف چار میٹر لمبا ہے اور ایلومینیم کے مرکب سے بنے ڈھانچے کی بدولت اس کا وزن پانچ ٹن ہے ۔ جو اسے ٹرکوں، ہوائی جہازوں اور یہاں تک کہ سیٹلائٹ پر بھی نصب کرنے کے لیے کافی چھوٹا اورقابل عمل بناتا ہے۔ چنانچہ اسے سیٹلائٹس پر لگا کر، آپریٹرز خطرے کے طور پر نشان زد سیٹلائٹ سے آسانی سے نمٹ سکتے ہیں۔
ٹی پی جی 1000سیزپر کام کرنے والی ٹیم نے دعویٰ کیا ہے کہ یہ نظام ایک سیشن میں 3000 توانائی کی طاقتور لہریںپیدا کر سکتا ہے جو اس طرح کے اب تک بنائے گئے دوسرےآلات سے کہیں زیادہ ہے۔یہی نہیں یہ نظام اب تک 200,000 سے زیاد ہ متحرک لہریں پیدا کر چکاہے۔ جو مستحکم اور قابل اعتماد کارکردگی کامظہر ہیں اور ہائی پاور سسٹمز کی کثیر پلیٹ فارم تعیناتی کی نشاندہی کرتا ہے۔
اسی حوالے سےچینی جریدےساؤتھ چائنا مارننگ پوسٹ کی رپورٹ میں کہا گیا ہے کہ 20گیگا واٹ توانائی تو بہت زیادہ ہے ۔اور صرف ایک گیگا واٹ توانائی کے ساتھ ہی زمین پر نصب مائیکروویو ہتھیار سٹار لنک سیٹلائٹ مواصلات میں خلل ڈال سکتا ہے۔بلکہ خود سیٹلائٹ کو بھی نقصان پہنچا سکتا ہے۔
ٹی پی جی 1000سیز نظام بنانے والے سائنسدانوں نے وضاحت کی کہ انھوں نے روایتی سیدھے ٹیوب ڈیزائن کو ایک مختصر2یو شکل کی ٹیوب والے ڈھانچے سے بدل دیا ہے۔ جس سے موثر طریقے سے توانائی کی طاقتور لہریں پیدا کی جا سکتی ہیں۔اس کے ساتھ عمومی اپ گریڈز جیسے بہتر موصل تیل پر منتقلی توانائی کو ذخیرہ کرنےکی صلاحیت کو نمایاں طور پربڑھا دیتی ہے۔
یاد رہے کہ چینی حکام نےمتعدد بار خبردار کیا ہےکہ ایلون مسک کی کمپنی سپیس ایکس کےسٹار لنک سیٹلائٹس اس کی قومی سلامتی کے لیے خطرہ ہیں۔ اور ملک "سٹار لنک کا قاتل” ہتھیار تیار کر رہا ہے۔ جن میں ہائی پاور مائیکرو ویو سسٹم اور لیزرز شامل ہیں جو کم قیمت پر میگا برج کا مقابلہ کرنے کی صلاحیت رکھتے ہیں۔
یہ امر بھی قابل ذکر ہے کہ سپیس ایکس دوسرے سیٹلائٹس اور خلائی ملبے کے ساتھ تصادم کے خطرات کو کم کرنے کے لیے اپنے سٹا ر لنک سیٹلائٹس کی اونچائی کو کم کر رہا ہے۔ مگر اس اقدام سے اسکے سیٹلائٹس کو زمینی نظام کے حملوں کا زیادہ خطرہ لاحق ہے۔
