لاہور( پاک ترک نیوز) معروف شاعر سید سلمان گیلانی کی نماز جنازہ ادا کر دی گئی ۔
تفصیلات کے مطابق جامعہ اشرفیہ لاہور میں سید سلمان گیلانی ؒ کی نمازِ جنازہ ادا کر دی گئی۔ اہلِ خانہ، علماء کرام، طلبہ اور مختلف طبقات سے تعلق رکھنے والے افراد کی بڑی تعداد نے شرکت کی اور آپؒ کے لیے دعائے مغفرت کی۔
شاعر سید سلمان گیلانی کے اہلخانہ کے مطابق وہ دل اور جگر کے عارضے میں مبتلا تھے۔ جبکہ گزشتہ چند روز سے انہیں نمونیا کا عارضہ بھی لاحق تھا۔
مرحوم نے اپنی فکر انگیز اور با مقصد شاعری کے ذریعے معاشرے میں شعور، اقدار اور دینی و ملی احساس کو اجاگر کیا۔ ان کا اسلوب باوقار، پیغام مثبت اور کردار سنجیدہ ادبی روایت کا آئینہ دار تھا۔
سید سلمان گیلانی اپنے منفرد کلام اور جداگانہ اسلوب کے باعث ادبی حلقوں میں خاص پہچان رکھتے تھے۔ ان کی شاعری میں فکری گہرائی اور معاشرتی موضوعات نمایاں تھے، جس کی بدولت انہیں اہل ادب میں قدر کی نگاہ سے دیکھا جاتا تھا۔
