کراچی(پاک ترک نیوز) ملک میں قدرتی گیس کی پیداوار گزشتہ 10 سال کے دوران تقریباً نصف رہ گئی، جس کے باعث سوئی سدرن گیس کمپنی نے گھریلو صارفین کو ناشتے، دوپہر اور رات کے کھانے کے اوقات میں گیس فراہم کرنے کا فیصلہ کیا ہے۔
ایم ڈی سوئی سدرن گیس کمپنی محمد امین راجپوت کے مطابق گیس کے ذخائر میں مسلسل کمی کے باعث کمپنی کو فراہمی محدود کرنا پڑ رہی ہے، جبکہ ایران جنگ کے بعد اپریل سے درآمدی مائع قدرتی گیس کی دستیابی بھی مشکل ہوگئی ہے۔
ان کا کہنا تھا کہ کمپنی نے گیس کی دستیابی کے مطابق ناشتے، دوپہر اور رات کے کھانے کے اوقات میں فراہمی یقینی بنانے کا فیصلہ کیا ہے تاکہ گھریلو صارفین کو کھانا پکانے کے اہم اوقات میں گیس دستیاب ہو۔
محمد امین راجپوت کے مطابق سوئی سدرن کے لیے گیس کی دستیابی کم ہوکر تقریباً 605 ملین مکعب فٹ یومیہ رہ گئی ہے، جبکہ گزشتہ سال یہ مقدار 695 ملین مکعب فٹ یومیہ تھی۔ دستیاب گیس میں سے تقریباً 300 ملین مکعب فٹ گھریلو صارفین کو فراہم کی جا رہی ہے، جبکہ باقی گیس صنعت، بجلی گھروں اور کھاد کے شعبے کو دی جا رہی ہے۔
ایم ڈی ایس ایس جی سی نے کہا کہ کراچی میں مجموعی طور پر گیس کی فراہمی مناسب ہے، تاہم مختلف علاقوں کے شہری کم دباؤ کے باعث کھانا پکانے میں مشکلات کی شکایات کر رہے ہیں۔ ان کے مطابق کسی ایک علاقے کے مسئلے کو پورے نظام کی صورتِ حال قرار نہیں دیا جا سکتا۔ کمپنی کا پائپ لائن نیٹ ورک تقریباً 50 ہزار کلومیٹر پر مشتمل ہے، جس میں سے 16 ہزار کلومیٹر کراچی میں ہے۔
انہوں نے گیس کے کم دباؤ کی ایک بڑی وجہ غیر قانونی کمپریسرز اور سکشن پمپس کے استعمال کو قرار دیتے ہوئے کہا کہ یہ آلات پورے محلے یا عمارت کی گیس کھینچ سکتے ہیں۔ ان کے استعمال سے نہ صرف گیس کی فراہمی متاثر ہوتی ہے بلکہ حادثات اور جانی نقصان کا خطرہ بھی بڑھ جاتا ہے۔
محمد امین راجپوت نے صارفین سے اپیل کی کہ ایسے غیر قانونی آلات کے استعمال کی اطلاع کمپنی کو دیں تاکہ گیس کا دباؤ بحال کیا جا سکے۔
ان کا کہنا تھا کہ کمپنی نے مالی سال 2025-26 کے دوران تقریباً 7 ہزار کلومیٹر پرانی اور زنگ آلود گیس پائپ لائنیں تبدیل اور بحال کیں، جس سے دور دراز علاقوں میں دباؤ بہتر بنانے اور گیس کے ضیاع میں کمی لانے میں مدد ملی۔
ایم ڈی ایس ایس جی سی کے مطابق قطر سے درآمد ہونے والی دوبارہ گیس میں تبدیل شدہ مائع قدرتی گیس کی دستیابی میں بھی نمایاں کمی ہوئی ہے، جبکہ بجلی اور کھاد کے شعبوں کی ضروریات پوری کرنے کے لیے بھی محدود گیس مختص کرنا پڑ رہی ہے۔












