راولپنڈی (پاک ترک نیوز)پاکستان اور سری لنکا کے درمیان پہلے ٹیسٹ میچ کے چوتھے روز خراب روشنی کے باعث کھیل روک دیا گیا، پاکستان نے دوسری اننگز میں ایک وکٹ کے نقصان پر 57 رنز بنا لیے ہیں۔
پنڈی کرکٹ اسٹیڈیم میں کھیلے جا رہے ٹیسٹ میچ میں سری لنکا نے پہلی اننگز میں 446 رنز بنائے اور 12 رنز کی برتری حاصل کی تھی۔
پاکستان نے دوسری اننگز کا آغاز کیا تو قومی ٹیم کو ابتدا میں ہی ایک وکٹ کا نقصان اٹھانا پڑا، تاہم کھیل روکے جانے تک پاکستان نے ایک وکٹ پر 57 رنز بنا لیے تھے۔
پاکستان کو مجموعی طور پر سری لنکا کے خلاف 45 رنز کی برتری حاصل ہو گئی ہے۔
اس سے قبل سری لنکا نے چوتھے روز اپنی پہلی اننگز کا آغاز کیا تو دھننجیا ڈی سلوا اور کوشل مینڈس کریز پر موجود تھے۔ مہمان ٹیم کی جانب سے دھننجیا ڈی
سلوا نے 167 جبکہ کوشل مینڈس نے 119 رنز کی شاندار اننگز کھیلی۔
یہ بھی پڑھیں:وزیراعظم شہباز شریف کی سوڈانی صدر جنرل عبدالفتاح البرہان سے ملاقات
پاکستان کی جانب سے ڈیبیو کرنے والے ثاقب خان نے 7 وکٹیں حاصل کیں، محمد عباس نے 2 اور رضا اللہ نے ایک کھلاڑی کو آؤٹ کیا۔
واضح رہے کہ پاکستان نے اپنی پہلی اننگز 434 رنز 9 کھلاڑی آؤٹ پر ڈکلیئر کی تھی۔ پاکستان کی جانب سے سعود شکیل نے 93، طیب عارف نے 57، عرفات منہاس نے 52، محمد طحٰہ نے 51 اور بابر اعظم نے 50 رنز بنائے تھے۔
