کراچی( )نیشنل کمانڈ اینڈ کنٹرول سینٹر نے بیرونِ ملک بھیک مانگنے میں ملوث ملزمان اور ان سے منسلک نیٹ ورکس کا تفصیلی ڈیٹا طلب کر لیا ہے۔اس حوالے سے ایڈیشنل ڈائریکٹر جنرل امیگریشن ونگ، ایف آئی اے ہیڈ کوارٹرز کو مراسلہ ارسال کیا گیا ہے، جس میں بیرونِ ملک بھیک مانگنے میں ملوث افراد اور بھکاری نیٹ ورکس کی تفصیلات فراہم کرنے کی ہدایت کی گئی ہے۔مراسلے کے مطابق طلب کردہ ریکارڈ میں ملزمان کے ذاتی کوائف، پاسپورٹ نمبرز، ڈی پورٹ کرنے والے ممالک کے نام اور واچ لسٹ پر موجودگی کی حیثیت شامل ہے۔اس کے علاوہ ملزمان کے متعلقہ اضلاع، سفر اور ڈی پورٹ کیے جانے کی تاریخوں، متعلقہ انسدادِ انسانی اسمگلنگ سرکلز کے نام، درج مقدمات اور زیرِ تفتیش انکوائریوں کی تعداد کی تفصیلات بھی طلب کی گئی ہیں۔
یہ بھی پڑھیں: مونچھوں والے نومولود کی ویڈیوسوشل میڈیاپروائرل، صارفین کے دلچسپ تبصرے
مراسلے میں ایف آئی اے سے مطلوبہ ریکارڈ کی سافٹ کاپی جلد از جلد ارسال کرنے کا کہا گیا ہے۔حکام کے مطابق طلب کردہ معلومات کا مقصد بیرونِ ملک بھیک مانگنے والے پاکستانیوں اور ان سے منسلک نیٹ ورکس کا مرکزی ڈیٹا مرتب کرنا ہے، تاکہ اس ریکارڈ کی مدد سے عادی طور پر بھیک مانگنے کے لیے سفر کرنے والے افراد اور منظم نیٹ ورکس کی نشاندہی کرتے ہوئے اس سرگرمی کی روک تھام کے لیے اقدامات کیے جا سکیں۔
