اسلام آباد(پاک ترک نیوز) سرکاری حج اسکیم کے تحت حج واجبات کی دوسری قسط جمع کرانے کے لیے صرف آج کا دن باقی رہ گیا، وزارتِ مذہبی امور نے عازمینِ حج کو ہدایت کی ہے کہ وہ 20 اکتوبر تک اپنے واجبات کی ادائیگی لازمی مکمل کر لیں۔
ترجمان وزارتِ مذہبی امور کے مطابق عازمینِ حج واجبات کی ادائیگی کے لیے قومی انفارمیشن ٹیکنالوجی بورڈ کے حج پورٹل یا پاک حج موبائل ایپ کا استعمال کر سکتے ہیں۔
حج پورٹل پر ادائیگی بینک کارڈ، ون لنک یا دستی بینک چالان کے ذریعے کی جا سکتی ہے۔ ترجمان نے خبردار کیا ہے کہ حج درخواست منسوخ ہونے سے بچانے کے لیے مقررہ تاریخ تک واجبات کی ادائیگی یقینی بنائی جائے۔
وزارتِ مذہبی امور نے عازمینِ حج کے لیے طبی معائنے اور صحت سے متعلق دستاویزات کی تکمیل بھی لازمی قرار دی ہے۔ عازمین حج پورٹل پر دستیاب طبی اہلیت کا سرٹیفکیٹ ڈاؤن لوڈ کرکے مستند ڈاکٹر سے اس کی تصدیق کروائیں اور تصدیق شدہ سرٹیفکیٹ حج پورٹل پر اپ لوڈ کریں۔
یہ بھی پڑھیں: سروں کی ملکہ زبیدہ خانم کو دنیا سے رخصت ہوئے 13 برس بیت گئے
ترجمان کے مطابق عازمینِ حج نئی معلومات، ضروری ہدایات اور حج سے متعلق تازہ ترین تفصیلات حاصل کرنے کے لیے پاک حج موبائل ایپ کا لازمی استعمال کریں۔
وزارتِ مذہبی امور نے عازمین کو ہدایت کی ہے کہ وہ آخری تاریخ کا انتظار کرنے کے بجائے واجبات کی ادائیگی اور طبی دستاویزات کی تکمیل بروقت یقینی بنائیں تاکہ حج درخواست کی منسوخی یا دیگر مشکلات سے بچا جا سکے۔
