ہالی وڈ(پاک ترک نیوز)مشہور ایکشن فلمی سلسلے ’’جان وِک‘‘ کے انداز میں ایک نئی ایکشن اور مزاح سے بھرپور فلم ’’دی ہالیڈے ہٹ مین‘‘ شائقین کے لیے پیش کی جا رہی ہے۔ فلم میں کرسمس کی خوشیوں، خاندانی مسائل اور خطرناک قاتلوں کے درمیان ہونے والی لڑائی کو منفرد انداز میں پیش کیا گیا ہے۔
فلم کی کہانی ہینک کارٹر نامی ایک ماہر قاتل کے گرد گھومتی ہے، جو اپنی بیوی اور بچوں کے ساتھ تعلقات بہتر بنانے اور اپنی ازدواجی زندگی بچانے کے لیے آخری کوشش کرتا ہے۔ وہ اپنے خاندان کو کرسمس کی بہترین چھٹیاں گزارنے کے لیے ایک پُرتعیش جھیل کنارے واقع حویلی میں لے جاتا ہے۔
ہینک اپنے خطرناک پیشے کو خاندان سے چھپانے کی کوشش کرتا ہے، لیکن ماضی کے دشمن اس کی جان لینے کے لیے حویلی پر حملہ کردیتے ہیں۔ اس کے سر کی قیمت مقرر ہونے کے بعد کرسمس کے مختلف روپ دھارے قاتل بھی اس کے تعاقب میں پہنچ جاتے ہیں۔
ہینک کو اپنے خاندان کو خطرے سے بچانے کے لیے ہر ممکن حربہ آزمانا پڑتا ہے۔ فلم میں کرسمس کی سجاوٹ، تحائف اور دیگر اشیا کو بھی لڑائی کے دوران استعمال کرتے دکھایا گیا ہے، جس سے سنجیدہ ایکشن کے ساتھ مزاحیہ مناظر بھی جنم لیتے ہیں۔
یہ بھی پڑھیں: استنبول میں شدید بارشوں کا 80سالہ ریکارڈ ٹو ٹ گیا ،3افراد ہلاک
تقریباً 98 منٹ دورانیے کی اس فلم میں نک ساگر، رکی نورووڈ، الیکسا ایڈوسن اور دیگر اداکار شامل ہیں۔
فلم ’’دی ہالیڈے ہٹ مین‘‘ تین نومبر 2026 کو ڈیجیٹل پلیٹ فارمز اور آن ڈیمانڈ سروسز پر ریلیز کی جائے گی۔
