لاہور( پاک ترک نیوز) وزیراعلیٰ پنجاب مریم نواز شریف کی ای بائیکس سکیم نے مقبولیت کے نئے ریکارڈ قائم کر دیے، حکومت پنجاب کی کسی بھی سکیم میں پہلی بار 13 لاکھ سے زائد نوجوانوں نے رجسٹریشن کرائی، جبکہ 6 لاکھ 7 ہزار سے زائد درخواستیں جمع ہونے کے بعد درخواستیں وصول کرنے کا عمل مکمل ہو گیا۔وزیراعلیٰ مریم نواز شریف نے متعلقہ حکام کو سکیم کا عمل جلد از جلد مکمل کرنے کی ہدایت کر دی ہے۔سکیم کے تحت قرعہ اندازی کے ذریعے ایک لاکھ خوش نصیب نوجوانوں کو ماہانہ 3 ہزار روپے کی آسان قسط پر برقی موٹر سائیکلیں فراہم کی جائیں گی۔ حکومت پنجاب ان موٹر سائیکلوں پر عائد سود خود ادا کرے گی، جس سے نوجوانوں کو آسان شرائط پر سواری میسر آئے گی۔
یہ بھی پڑھیں: افغانستان سے دہشت گردی کی عالمی سطح پر تصدیق
وزیراعلیٰ مریم نواز شریف کی ہدایت پر سکیم میں کامیاب ہونے والی طالبات کو مفت موٹر سائیکل چلانے کی تربیت بھی دی جائے گی۔مریم نواز شریف کا کہنا ہے کہ پنجاب کے نوجوانوں، بالخصوص طالبات کو آگے بڑھنے کے لیے تمام ممکنہ وسائل فراہم کیے جائیں گے۔ برقی موٹر سائیکلوں سے طالبات کو تعلیمی اداروں تک آمدورفت میں آسانی ہوگی اور ان کے ماہانہ اخراجات میں بھی کمی آئے گی۔وزیراعلیٰ پنجاب نے کہا کہ پنجاب کا ہر بیٹا اور بیٹی ان کے لیے بہت خاص ہے اور حکومت نوجوانوں کو سہولتیں فراہم کرنے کے لیے پرعزم ہے۔
