سہیل آفریدی کی سرکاری افسران کو آئینی حقوق کا تحفظ کرنے کی ہدایت

پشاور(پاک ترک نیوز ) وزیراعلیٰ خیبر پختونخوا محمد سہیل خان آفریدی نے سرکاری افسران کو شہریوں کے بنیادی آئینی حقوق اور قانون کی حکمرانی یقینی بنانے کی ہدایت کر دی۔
وزیراعلیٰ نے واضح کیا ہے کہ شہریوں کو پُرامن اجتماع، آزادیٔ اظہار اور نقل و حرکت کے حق کے استعمال میں کسی غیرقانونی رکاوٹ کا سامنا نہیں ہونا چاہیے۔ تمام سرکاری افسران اپنے فرائض غیرجانبداری اور پیشہ ورانہ ذمہ داری کے ساتھ انجام دیں۔
محمد سہیل خان آفریدی نے ہدایت کی کہ کوئی بھی افسر بیرونی دباؤ، اثرورسوخ یا غیرمتعلقہ احکامات کے تحت کام نہ کرے۔ امن و امان برقرار رکھنے کے لیے تمام اقدامات قانون کے دائرے میں رہتے ہوئے اور بلاامتیاز کیے جائیں۔
وزیراعلیٰ خیبر پختونخوا نے مزید کہا کہ تمام کارروائیاں سیاسی وابستگی اور مصلحت سے بالاتر ہو کر کی جائیں، جبکہ متعلقہ افسران ان ہدایات پر فوری اور مکمل عمل درآمد یقینی بنائیں۔