لاہور( پاک ترک نیوز) وزیراعلیٰ پنجاب مریم نواز نے کہا ہے کہ دہشت گرد کہیں سے بھی آئیں، دہشت گرد ہی ہوتے ہیں، دہشت گردوں نے خیبر پختونخوا کا حسن تباہ کردیا ہے۔ لاہور میں سینئر افسران کے قیادت کورس کے شرکاء سے خطاب کرتے ہوئے مریم نواز نے خیبر پختونخوا کی موجودہ صورتحال، دہشت گردی اور ملک میں امن و امان کے حوالے سے اظہار خیال کیا۔مریم نواز نے کہا کہ خیبر پختونخوا پہلے کیا تھا اور اب کیا ہے، فوجی افسر اور جوان دہشت گردی کے خلاف جنگ میں شہید ہورہے ہیں۔اگر خوف کی وجہ سے فیصلے نہ کیے جائیں تو ملک آگے نہیں بڑھ سکتا۔ ان کے مطابق قیادت کا کام مشکل حالات میں فیصلے کرنا اور ریاستی اداروں کو مؤثر انداز میں آگے لے کر چلنا ہے۔
یہ بھی پڑھیں: کامیڈی کے بادشاہ عمر شریف کو بچھڑے پانچ برس بیت گئے
مریم نواز نے پنجاب اور دیگر صوبوں کی صورتحال کا تقابلی حوالہ دیتے ہوئے کہا کہ آج پنجاب میں دہشت گردی قابو میں ہے۔ ان کے مطابق صوبے میں امن و امان کی صورتحال بہتر بنانے کے لیے سکیورٹی اداروں کی استعداد بڑھانے اور جدید ٹیکنالوجی کے استعمال پر توجہ دی گئی ہے۔ پنجاب حکومت پہلے بھی سرحدی علاقوں میں سکیورٹی چیک پوسٹوں کو جدید آلات سے لیس کرنے اور خطرات سے بروقت نمٹنے کے لیے انٹیلی جنس نظام بہتر بنانے کے اقدامات کا ذکر کرچکی ہے۔ وزیراعلیٰ نے کہا کہ پنجاب سے ڈالہ کلچر کا خاتمہ کیا گیا جبکہ کچے کے علاقوں میں ریاست کی عملداری بحال کی گئی۔ ان کا کہنا تھا کہ کچے کے علاقے ماضی میں جرائم اور اغوا برائے تاوان کا مرکز سمجھے جاتے تھے، تاہم مشترکہ کارروائیوں کے بعد وہاں ریاستی رٹ قائم ہوئی ہے۔
