دبئی (پاک ترک نیوز ) ایشین کرکٹ کونسل نے ایشین گیمز 2026 میں مردوں اور خواتین کے کرکٹ مقابلوں کا شیڈول جاری کردیا، تمام میچز بیس اوورز کے طرز پر ناگویا کے پالومہ میزُوہو اسٹیڈیم میں کھیلے جائیں گے۔
کرکٹ مقابلے 17 ستمبر سے 3 اکتوبر تک جاری رہیں گے، خواتین کے مقابلے پہلے شروع ہوں گے جبکہ مردوں کا ٹورنامنٹ 24 ستمبر سے شروع ہوگا۔
بھارت دونوں مقابلوں کا دفاعی چیمپئن ہے، جس نے 2022 کے ایشین گیمز میں سونے کے تمغے حاصل کیے تھے۔
پاکستان کی خواتین ٹیم اپنی مہم کا آغاز 17 ستمبر کو تھائی لینڈ کے خلاف کرے گی، میچ پاکستانی وقت کے مطابق صبح 10 بجے شروع ہوگا۔ خواتین کے دونوں سیمی فائنلز 20 ستمبر کو ہوں گے، کانسی کا مقابلہ اور فائنل 22 ستمبر کو کھیلے جائیں گے۔
مردوں کے مقابلوں کا ابتدائی مرحلہ 24 سے 26 ستمبر تک ہوگا۔ افغانستان، جاپان، ہانگ کانگ، ملائیشیا، عمان اور نیپال ابتدائی مرحلے میں مدمقابل ہوں گے۔
پاکستان، بھارت، بنگلہ دیش اور سری لنکا کو ابتدائی درجہ بندی میں جگہ دی گئی ہے اور یہ چاروں ٹیمیں براہِ راست کوارٹر فائنل مرحلے سے ٹورنامنٹ کا آغاز کریں گی۔
پاکستان 28 ستمبر کو صبح 5 بجے گروپ بی میں دوسرے نمبر پر آنے والی ٹیم کے خلاف کوارٹر فائنل کھیلے گا، جبکہ بھارت اسی روز صبح 10 بجے گروپ اے میں دوسرے نمبر پر آنے والی ٹیم سے مقابلہ کرے گا۔
سری لنکا اور بنگلہ دیش کے کوارٹر فائنلز 29 ستمبر کو ہوں گے۔مردوں کے دونوں سیمی فائنلز یکم اکتوبر کو کھیلے جائیں گے، جبکہ کانسی کا تمغہ اور طلائی تمغے کا فیصلہ 3 اکتوبر کو ہوگا۔
