دی ہیگ(پاک ترک نیوز) نیدرلینڈز کے مرکزی بینک نے جغرافیائی کشیدگی میں اضافے کے پیش نظر شمالی امریکا میں موجود سونے کے بڑے ذخائر لندن منتقل کر دیئے۔نیدرلینڈز کے مرکزی بینک کے مطابق 86 ٹن سونا امریکا اور کینیڈا سے منتقل کرکے لندن میں بینک آف انگلینڈ کے پاس رکھ دیا گیا ہے۔ یہ منتقلی کئی ماہ تک جاری رہنے والے پیچیدہ آپریشن کے دوران مارچ سے اگست کے درمیان کی گئی۔
مرکزی بینک کے صدر اولاف سلِیپن نے کہا کہ یہ اقدام نیدرلینڈز کی بحران سے نمٹنے کی صلاحیت اور تیاری کو مضبوط بنانے کے لیے ضروری تھا۔بینک کے مطابق 27 ٹن سونے کی سلاخیں نیویارک اور اوٹاوا سے نیدرلینڈز کے شہر زیست منتقل کی گئیں، جس کے بعد تقریباً اسی مقدار اور معیار کا سونا لندن منتقل کیا گیا۔ سونے کی سلاخوں کو دوبارہ پگھلانے کی ضرورت پیش نہیں آئی۔
یہ بھی پڑھیں: سونا مزید مہنگا، ایک تولہ 3900روپے بڑھ گیا
باقی سونا نیویارک میں فروخت کرکے لندن میں دوبارہ خرید لیا گیا۔ نیدرلینڈز کے مرکزی بینک کے مطابق لندن میں سونے کی موجودگی سے بحران کی صورت میں اسے زیادہ آسانی سے عالمی مارکیٹ میں خریدا اور فروخت کیا جاسکے گا۔
