بشکیک ( پاک ترک نیوز) بشکیک میں شنگھائی تعاون تنظیم، ایس سی او، کے سربراہانِ مملکت کا اہم اجلاس جاری ہے، جس میں وزیراعظم محمد شہباز شریف سمیت تنظیم کے رکن ممالک کے سربراہان شریک ہیں۔ اجلاس میں روس کے صدر ولادیمیر پیوٹن، چین کے صدر شی جن پنگ اور ایران کے صدر مسعود پزشکیان سمیت دیگر اہم رہنما بھی موجود ہیں۔
وزیراعظم شہباز شریف تین روزہ سرکاری دورے پر کرغزستان کے دارالحکومت بشکیک پہنچے ہیں، جہاں وہ ایس سی او کونسل آف ہیڈز آف اسٹیٹ کے اجلاس اور ایس سی او پلس سربراہ اجلاس میں شرکت کر رہے ہیں۔ پاکستان اس اجلاس کے بعد ایس سی او کونسل آف ہیڈز آف اسٹیٹ کی ایک سال کے لیے صدارت بھی سنبھالے گا۔ کانگریس ہال پہنچنے پر کرغزستان کے صدر صدر ژاپاروف نے وزیراعظم شہباز شریف کا پرتپاک استقبال کیا۔ وزیراعظم اور کرغزستان کے صدر نے مصافحہ کیا، جس کے بعد وزیراعظم کو گارڈ آف آنر بھی پیش کیا گیا۔اجلاس کے موقع پر ایس سی او کے رکن ممالک کے سربراہان نے گروپ فوٹو بھی بنوایا۔ عالمی اور علاقائی سطح پر اہمیت کے حامل اس اجلاس میں رکن ممالک کے درمیان تعاون، علاقائی سلامتی، معاشی روابط، تجارت، توانائی، رابطہ کاری اور باہمی تعاون کے فروغ سمیت مختلف امور زیرِ بحث آنے کا امکان ہے۔
وزیراعظم شہباز شریف اجلاس میں پاکستان کا مؤقف بھی پیش کریں گے اور علاقائی و عالمی امور پر اظہارِ خیال کریں گے۔ وزیراعظم کے دورے کے دوران شریک ممالک کے رہنماؤں سے دوطرفہ ملاقاتیں بھی شیڈول ہیں۔ وزیراعظم شہباز شریف نے دورے کے دوران ایرانی صدر مسعود پزشکیان سے بھی ملاقات کی، جس میں پاکستان اور ایران کے دیرینہ تعلقات، دوطرفہ تعاون اور علاقائی صورتحال پر تبادلہ خیال کیا گیا۔ دونوں رہنماؤں نے باہمی تعاون کو مزید مضبوط بنانے پر زور دیا۔
یہ بھی پڑھیں: وزیراعظم شہباز شریف کی کرغزستان میں ایرانی صدر سے ملاقات
ایس سی او اجلاس میں روس اور چین کی اعلیٰ قیادت کی شرکت بھی خصوصی اہمیت کی حامل ہے۔ صدر پیوٹن اور صدر شی جن پنگ نے بھی اجلاس کے موقع پر ملاقات کی اور عالمی و علاقائی صورتحال سمیت دونوں ممالک کے تعلقات پر تبادلہ خیال کیا۔
