اسلام آباد ( پاک ترک نیوز) وزیراعظم شہباز شریف کو سانحہ پمز کی عبوری انکوائری رپورٹ کی اہم سفارشات موصول ہوگئی ہیں۔ذرائع کے مطابق انکوائری کمیٹی نے ایگزیکٹو ڈائریکٹر پمز ڈاکٹر عمران سکندر سمیت 10 اعلیٰ افسران اور متعلقہ عملے کو فوری طور پر عہدوں سے ہٹانے کی سفارش کی ہے، جن میں پانچ اعلیٰ افسران بھی شامل ہیں۔ذرائع کا کہنا ہے کہ انکوائری کمیٹی نے مذکورہ افسران کو غفلت اور لاپرواہی کا مرتکب قرار دیا ہے۔ رپورٹ میں کہا گیا ہے کہ پمز کو انتہائی غیر پیشہ ورانہ انداز میں اور مناسب انتظامی ڈھانچے کے بغیر چلایا جا رہا تھا۔
یہ بھی پڑھیں: سانحہ پمز، انکوائری رپورٹ کی سفارشات پر عملدرآمد شروع، ایگزیکٹو ڈائریکٹرڈاکٹر عمران سکندر کو عہدہ چھوڑنے کی ہدایت
کمیٹی نے پمز کے لیے باقاعدہ گورننگ بورڈ اور مؤثر مانیٹرنگ نظام قائم کرنے کی سفارش کی ہے، جبکہ ہٹائے جانے والے افسران کی جگہ پیشہ ور افراد تعینات کرنے کی تجویز بھی دی گئی ہے۔رپورٹ میں پمز کو چلانے کے لیے واضح انتظامی ڈھانچہ تشکیل دینے کی بھی سفارش کی گئی ہے۔ ذرائع کے مطابق رپورٹ میں موجودہ قائم مقام سیکرٹری کیپٹن (ر) محمود کی سفارشات بھی شامل ہیں۔
