لاہور( پاک ترک نیوز) وزیراعلیٰ پنجاب مریم نواز نے کہا ہے کہ پنجاب کو جدید ٹیکنالوجی اور ڈیجیٹل معیشت کا مرکز بنانا چاہتے ہیں، چین کے ساتھ ٹیکنالوجی اور ڈیجیٹل شعبے میں تعاون مزید بڑھایا جائے گا۔چین میں عالمی بگ ڈیٹا ایکسپو سے خطاب کرتے ہوئے مریم نواز نے کہا کہ پنجاب حکومت ڈیجیٹل تبدیلی اور جدید ٹیکنالوجی کے فروغ کے لیے متعدد اقدامات کر رہی ہے، جبکہ نوجوانوں کو جدید ٹیکنالوجی کی تعلیم اور ہنر فراہم کیے جارہے ہیں۔
وزیراعلیٰ پنجاب نے کہا کہ مصنوعی ذہانت اور بگ ڈیٹا مستقبل کی ترقی میں اہم کردار ادا کریں گے، پنجاب حکومت نوجوانوں کو مستقبل کی ضروریات کے مطابق تیار کرنے کے لیے جدید شعبوں میں مواقع فراہم کر رہی ہے۔مریم نواز نے کہا کہ پاکستان اور چین کی دوستی آزمودہ اور مضبوط ہے، دونوں ممالک کے عوام ایک دوسرے سے محبت اور احترام کا رشتہ رکھتے ہیں۔
انہوں نے کہا کہ چین کے ساتھ ٹیکنالوجی، مصنوعی ذہانت اور ڈیجیٹل معیشت کے شعبوں میں تعاون بڑھانے سے پنجاب میں نئی سرمایہ کاری، روزگار کے مواقع اور معاشی ترقی کی راہیں ہموار ہوں گی۔
