اسلام آباد ( پاک ترک نیوز) سانحہ پمز کی عبوری تحقیقاتی رپورٹ وزیراعظم کو پیش کردی گئی۔ ذرائع کے مطابق انکوائری کمیٹی کے سربراہ سابق سیکرٹری داخلہ شاہد خان نے رپورٹ جمع کروائی۔ذرائع کا کہنا ہے کہ رپورٹ رات گئے وزیراعظم کے مشیر توقیر شاہ کے دفتر میں جمع کرائی گئی، جس کے بعد توقیر شاہ نے رپورٹ وزیراعظم کو بھجوا دی اور انہیں رپورٹ کے مندرجات اور سفارشات سے بھی آگاہ کردیا۔ذرائع کے مطابق رپورٹ پبلک کرنے کا اختیار وزیراعظم کو دے دیا گیا ہے، جبکہ رپورٹ پر انکوائری کمیٹی کے تمام اراکین کے دستخط موجود ہیں۔
رپورٹ میں سانحہ پمز کی وجوہات اور ذمہ داروں کا تعین بھی کیا گیا ہے۔ ریسکیو ٹیموں کو امدادی کارروائیوں کے دوران پیش آنے والے مسائل کا بھی رپورٹ میں تفصیلی ذکر کیا گیا ہے۔ذرائع کے مطابق سانحے کے وقت پمز کا جو متعلقہ عملہ ڈیوٹی سے غیر حاضر تھا، ان کے خلاف کارروائی کی سفارش کی گئی ہے۔ پمز انتظامیہ اور ڈاکٹروں کے انٹرویوز کے ساتھ فائر بریگیڈ اور ریسکیو ٹیموں کے بیانات بھی تحقیقاتی رپورٹ کا حصہ بنائے گئے ہیں۔
یہ بھی پڑھیں: وزیر داخلہ محسن نقوی کا کراچی ایئر پورٹ کا دورہ ، امیگریشن پراسیس کا جائزہ
ذرائع کا کہنا ہے کہ رپورٹ میں ذمہ دار افراد کے خلاف فوری کارروائی کی وزیراعظم کو سفارش کی گئی ہے۔ وزیراعظم نے رپورٹ کی روشنی میں فوری ایکشن لینے کا فیصلہ کیا ہے، جس کے بعد متعلقہ ذمہ داروں کے خلاف جلد کارروائی کا امکان ہے۔
