دبئی ( پاک ترک نیوز) ویمنز ٹی20 ایشیا کپ 2026 کا آج سے دبئی میں آغاز ہو رہا ہے، افتتاحی میچ میں تھائی لینڈ اور ہانگ کانگ کی خواتین ٹیمیں آمنے سامنے ہوں گی۔ ٹورنامنٹ کے تمام 15 میچز دبئی انٹرنیشنل اسٹیڈیم میں کھیلے جائیں گے، جبکہ میگا ایونٹ 13 ستمبر تک جاری رہے گا۔ ایونٹ میں ایشیا کی آٹھ ٹیمیں شریک ہیں جنہیں دو گروپس میں تقسیم کیا گیا ہے۔ گروپ اے میں پاکستان، بھارت، تھائی لینڈ اور ہانگ کانگ جبکہ گروپ بی میں دفاعی چیمپئن سری لنکا، بنگلہ دیش، متحدہ عرب امارات اور انڈونیشیا شامل ہیں۔
پاکستان ویمنز ٹیم اپنی ایشیا کپ مہم کا آغاز یکم ستمبر کو تھائی لینڈ کے خلاف کرے گی۔ قومی ٹیم کا دوسرا میچ روایتی حریف بھارت کے خلاف 5 ستمبر کو ہوگا، جبکہ گروپ مرحلے کا آخری میچ 7 ستمبر کو ہانگ کانگ کے خلاف شیڈول ہے۔ گروپ مرحلے کے اختتام پر دونوں گروپس کی سرفہرست دو، دو ٹیمیں سیمی فائنل میں جگہ بنائیں گی۔ سیمی فائنلز 10 اور 11 ستمبر کو کھیلے جائیں گے، جبکہ ٹورنامنٹ کا فائنل 13 ستمبر کو ہوگا۔
یہ بھی پڑھیں: لارڈز ٹیسٹ کے دوران عمران خان کے بیٹوں کا انٹرویو نشر ہونے پر پی سی بی کی براڈکاسٹر سے شکایت
پاکستانی ٹیم کی قیادت فاطمہ ثنا کر رہی ہیں۔ قومی ٹیم نے ایشیا کپ کی تیاری کے لیے لاہور میں دس روزہ تربیتی کیمپ میں حصہ لیا اور 26 اگست کو متحدہ عرب امارات پہنچ گئی تھی۔ پاکستان ویمنز ٹیم ایشیا کپ میں ماضی میں دو مرتبہ رنر اپ رہ چکی ہے، جبکہ 2022 اور 2024 کے ایڈیشنز میں قومی ٹیم سیمی فائنل تک پہنچی تھی۔ اس بار پاکستانی ٹیم کی نظریں بہتر کارکردگی اور ٹائٹل کے حصول پر مرکوز ہیں۔
