لندن(پاک ترک نیوز) پاکستان کرکٹ بورڈ نے لارڈز ٹیسٹ کے دوران بانی پی ٹی آئی عمران خان کے بیٹوں سلیمان خان اور قاسم خان کا انٹرویو نشر کرنے پر آفیشل براڈکاسٹر سے باضابطہ شکایت کردی۔
کرکٹ ویب سائٹ کے مطابق لارڈز ٹیسٹ کے پہلے روز لنچ بریک کے دوران سابق انگلش کپتان اور براڈکاسٹر کے کمنٹیٹر مائیک ایتھرٹن نے سلیمان اور قاسم خان کا تقریباً 18 منٹ پر مشتمل انٹرویو کیا، جسے بعد ازاں نشر کردیا گیا۔انٹرویو میں سلیمان خان اور قاسم خان نے اپنے والد عمران خان کی صحت کے حوالے سے تشویش کا اظہار کیا۔
رپورٹ کے مطابق پی سی بی نے انٹرویو نشر ہونے سے قبل ہی براڈکاسٹر سے رابطہ کرکے احتجاج کیا اور مبینہ طور پر مؤقف اختیار کیا کہ انٹرویو نشر نہ کیا جائے۔ کرکٹ ویب سائٹ کا دعویٰ ہے کہ پی سی بی کی جانب سے یہ دھمکی بھی دی گئی کہ اگر انٹرویو نشر کیا گیا تو پاکستانی کھلاڑی لنچ کے بعد دوسرے سیشن کے لیے میدان میں واپس نہیں آئیں گے۔پی سی بی کے احتجاج کے دوران اسکائی براڈکاسٹنگ نے انٹرویو کچھ دیر کے لیے مؤخر کردیا، تاہم معاملے پر بات چیت جاری تھی کہ تقریباً 18 منٹ کا مکمل انٹرویو نشر کردیا گیا۔
یہ بھی پڑھیں: ویمنز ایشیا کپ: پاکستان ویمن ٹیم دبئی روانہ، بھارت سے ٹاکرا 5 ستمبر کو ہوگا
رپورٹ کے مطابق انٹرویو ختم ہونے تک پاکستانی کھلاڑی دوسرے سیشن کے لیے میدان میں واپسی کی تیاری کر رہے تھے اور بعد ازاں قومی ٹیم نے میچ میں شرکت کی۔مائیک ایتھرٹن نے یہ انٹرویو بدھ کی صبح لارڈز کے رائٹرز روم میں کیا تھا، جبکہ براڈکاسٹر کی جانب سے لارڈز ٹیسٹ سے قبل ہی انٹرویو کا ٹیزر بھی نشر کیا گیا تھا۔
